Nongpoh, Lber 09: Da ka jingiatrei lang bad ka jingiarap ki Pulit ka jylla Kerela, ki Pulit ka Ri Bhoi ki la ioh ban kem biang ia uwei u runar hadien 4 snem tam,ba u la lait phet na Thanad kaba u la shah kem ha ki Pulit ka Ri Bhoi, halor ka jingkynnoh na u don kti ha ki kam tuh ba la ujor pyrshah ia u ha Khanapara Police station katkum ka Case No. 52(11)2020 u/s 381 IPC.
U Heh Pulit ka Ri Bhoi, katkuk ka kyrwoh khubor ba la phah sha ki lad pathai khubor, u la iathuh ba une u runar u la lait phet na Thanad ha Khanapara naduh ka 20 tarik u Naiwieng 2020 bad naduh katei ka por u la phet reh ia lade ha kaba mynta hadien 4 snem tam la lap ksai bad la ioh biang ban kem ia u na ka jylla Kerela.
Une u runar la tip kyrteng kum u kum u Ranjan Borgohain, uba shong basah ha Duliajan ba hap ha ka Dibrugarh District jong ka jylla Assam.
Ha ka kyrwoh, u Superintendent of Police ka Ri Bhoi, u V.S Rathore, u la iathuh ba lap dien ia une u runar dang ha kine ki taiew ba u don ha ka jylla Kerela bad u la leit ban trei bylla ha kawei ka Karkhana ha Perumbavoor ha ka jylla Kerela.
Ka kyrwoh ka ong ruh, ba dei lyngba ka jingpan jingiarap na ki Pulit ka Kerela hadien ba la kem la phah noh ia u sha u heh pulit ka Ernakulum District jong ka jylla Kerela.
La ong ruh lyngba ka jingpan jingiarap ki Pulit ka Ri Bhoi, ki pulit ka Ernakulum, ki la ioh ba kem ia u ha ka 7 tarik u Lber 2025 bad da ka jingpan bor na ka Kashari la ioh ban rah noh ia u sha Ri Bhoi ban dang pynlong ia ka jingtohkit bad ban phah ruh sha ka jingbishar ka Chief Judicial Magistrate ha District Court ha Nongpoh.
Shuh shuh, na ka liang ki Pulit ka Ri Bhoi, ki ai ia kata ka jingkhublei kaba kyrpang ia ki Pulit ka Kerela bad dei lyngba ka jingiatrei lang ki Pulit ka Kerela la ioh ban kem biang ia une u runar uba la phet rieh ia lade la saw snem tam hadien ba u la lait phet na thanad jong ka Khanapara Police Station.
