Nongpoh, Lber 12: Ka Tnat Pulit Traffic na Nongpoh Police Station bad ka kynhun ki seng nongñiah Auto Rickshaw ba la tip kum ka Nongpoh Region Auto Owners and Drivers Association, (NRAO&DA), ki la shim syndon da ka rai kaba tyngeh ia kino kino ki dribar kiba pynkheiñ bad khamtam kiba dih kyiad ha ka por ba kamai paidbah, namar kane ka ju wan rah ia ki jingjia ba sngewsih bad bun ki mynsiem ba kordor ki duh noh ia la ka jingim tang na ka daw ka jingpynkheiñ aiñ ki Dribar ki bym burom ia ki kyndon aiñ ñiah Kali.
Kane jingshim rai ki Pulit Traffic bad ki kynhun ki seng Nongñiah Auto Rickshaw ha Nongpoh ban leh noh da kaba tyngeh ia ki dribar bad wat ia ki trai Kali kiba ym pynbiang ia ki kot ki sla, ka dei ruh hadien ba na ka liang ka tnad Pulit Traffic ka la dep ai ruh ban ai da ka jinghikai shaphang ki kyndon bapher bapher jong Motor Vehicles Act.
U Bah B. Thangkhiew kum uwei na u ophisar na ka tnad Traffic jong ka Nongpoh Police Station bad kumjuh ruh u President katei ka NRA&DA u Bah Banasar Lyngdoh, ki la kren sha ki lad pathai khubor, ba nangne shakhmat kin shim noh da ki lad kiba tyngeh ia kino kino ki dirbar kiba pynkheiñ aiñ bad ruh wat ki trai Kali kiba ym ym don ka jingkitkhlieh ia ki dribar ban pynbiang ia ki kot ki sla bad khamtam ba ki ju dih kyiad ha ka por ba kamai paidbah.
Ki la shim ruh ia ka rai ban ia trei lang ban tehlakam ia ki Kali kiba ym don kot don sla naduh ki Permit, ki License, ki Registration Certificate bad kiwei kiwei ki kot ba donkam ba la maham ba ki trai kali bad ki dirbar ki hap ban pynbiang noh bad nangne shakmat lada lap ba ki pynkheiñ ain kin ngat beit ha ka jingpynshitom katkum ka Motor Vehicle Act.
Na ka liang u Bah B. Thangkhiew kum u ophisar na ka tnad Traffic, u la ai ruh ka jingbatai shibun halor ki kyndon jong ka Motor Vehicle Act, 1988 bad khamtam ia ki Dribar ba dih kyiad kin ngat ha ka kuna kaba 10 hajar katkum ka Motor Vehicle Act, 1988 jong ka section 185 bad kynthup ruh kiwei kiwei ki kyndon kiba ym pynbiang ia ki kot ki sla. La hap ban pyrkhing bha ban pyntreikam ia kitei ki kyndon aiñ ka dei namar ba la jur palat ki jingjia ba sngewsih bad bun ki dribar bad wat ki trai kali kim don kata ka jingkitkhlieh ban bud ia kita ki kyndon ba la buh da ka sorkar.
