Nongpoh, Nohprah 20: Ka Umroi Sub-Center kaba la tei naduh u snem 1974, ka la ïoh ban rakhe ia ka jingdap ba 50 snem ha ki kam ban ai jingshakri ia ki paidbah katei ka thain bad ia katei ka jingrakhe la pynlong ha madan Umroi ha ka 18 tarik u Nohprah 2024, kaba la long ka sngi ban sah jingkynmaw halor ka jingkular u MLA ban shim khia na ka bynta ba kyntiew kyrdan noh ia katei ka Health Sub Centre sha ka Primary Health Centre.
Haba rakhe ia katei ka jingdap ba 50 snem ka Umroi Sub-Center, la sakhi da ka jingdon u Damanbait Lamare, MLA Umroi, u Bah Rangkynsai Kharbuki, MDC, u Raja Brahma, Project Director ka DRDA, ka Dr. A.J Syiemlieh, District Nodal officer, ki nongialam shnong ka thaiñ Umroi lem bad kiwei.
Ki nongkren ha katei ka sngi, ki la ong ba katei ka Umroi Sub-Center, ka la dei kawei na ki jaka ai jingsumar kaba la shakri eh na bynta ki paidbah kiba sah ha ki shnong kiba don ha ka thain Umroi, naduh ki por kiba mynshwa bad haduh kine ki sngi.
Kumba ka long mynta, ka Umroi Sub-Center, watla ka dei ka jaka ai jingsumar kaba rit, hynrei ka la long pat kum kawei na ki jaka ai jingsumar kaba paka eh bad kaba la ïoh ia ka jingiaroh na kiba bun, kaba kynthup ruh naduh ka sorkar jylla.
U Damanbait Lamare, haba u ai jingkren, u la ai jingiaroh halor ka rukom treikam jong katei ka Sub-Center bad kaba la ai jingmyntoi ia ki paidbah kiba leit ban shah sumar hapoh katei ka jaka ai jingsumar.
Na ka liang u MLA u la ai ka jingkular ba un ialeh shitom na bynta ban kyntiew kyrdan noh na ka Sub-Center sha ka kyrdan PHC, khnang ba kan da long shisha ka ban ai jingmyntoi ia ki paidbah ha ka thain Umroi hi baroh kawei, kaba un sa shim khia ban ia kren sha ka myntri ka tnad ka koit ka khiah bad wat sha ka sorkar jylla ba katei ka jaka ai jingsumar la donkam ban kyntiew kyrdan na Health Sub Centre sha ka Primary Health Centre.
