Nongpoh, K’lyngkot 04: Mynta ka sngi kaba dei ruh ka sngi Iew Umsning, ka Voice of the People’s Party (VPP), ka la pynbna ia ka kyrteng jong 5 ngut ki Kyrtong, ki ban sa iakhun na ki 5 tylli ki Konstitwensi ha kane ka Ilekshon MDC ka ban sa long shen ha u Bnai ban wan.
Ka kyrteng jong kitei ki 5 ngut ki Kyrtong, ki kynthup ia u Bah Apkyrmen Lyngdoh, u ban sa iakhun na Jirang Constituency, u Bah Mathew Makdoh na Nongpoh Constituency, u Bah Banrikus Nongsteng na Umsning Constituency, u Bah Kynjohlang Rangtong Mawhati Constituency bad u Bah Isynei Hinge na Umroi Constituency.
Haba pynbna ia ka kyrteng jong kitei ki 5 ngut ki Kyrtong, la sakhi da ka jingdon u Dr. Ricky AJ Syngkon, General Secretary ka VPP bad uba dei ruh u MP ka VPP na Shillong Seat, u Bah Brightstar Marbaniang, MLA Mawlai lem bad shibun kiwei pat ki nongialam ba hakhmat ka party VPP, la ka long ha Ri Bhoi bad kiba hapoh ka jylla.
Ha kane ka sngi, ki nongialam ka VPP naduh u MP u Dr. Ricky A.J Syngkon, u Bah Brighstar Marbaniang bad kiwei ki nongialam ki la pan ka jingkyrshan na ki paidbah ka Ri Bhoi ban kyrshan ia kine ki kyrtong na ka bynta ka jingkylla hapoh ka jylla Meghalaya.
Ki la kren ruh halor shibun ki nongrim jong ka party VPP ba ka kwah ban wan rah ia kata ka jingkylla hapoh ka jylla bad dei tang ka jingkyrshan ba radbah jong ki paidbah ba ka party VPP kan lah ban pynurlong ia shibun ki jingangnud ne ka thong jong ka party ban wan rah ia kata ka jingkylla hapoh kane ka jylla Meghalaya.
Na ka liang u MP u Dr. Ricky AJ Syngkon ruh u la kyrpad ia ki paidbah ka Ri Bhoi bad ka jylla hi baroh kawei, ba kin ailad ia ka party VPP,, namar dei tang lyngba ka jingpynkupbor ki paidbah ba ka party kan ioh bat ia ka bor bad kita ki jingangnud ne ki thong jong ka party VPP lah ban pyntreikam ne ban saindur thymmai ia kane ka jylla Meghalaya.
