Nongpoh, Nohprah 30: Ki Nongri Syiar na Ri Bhoi mynta ka sngi ki la mih pyrthei ban pynpaw ia ka jingsngewkhia halor ka jingbym lah ban pyniaid iew ia ki syiar ba ki ri, kaba dei na ka jingiapher jong ka dor ka mur jong ki syiar kiba wan na shabar bad ki syiar kiba ri ki Nongri Syiar na kane ka District bad ka jylla.
Kum ka jingsngewkhia halor ka jingshah ktha ki nongri syiar ha kane ka District, ki nongi syiar na Ri Bhoi khamtam na ka thain Umsning ki la ia mih paidbah bad ban pynpaw ia kata ka mynsiem jong ka jingsngewkhia ba bun na ki nongri syiar ki la shah ktah ha ka kam ri syiar kaba dei na ka daw ka jingbym ia kajuh ka dor ka mur jong ki syiar sha ki iew ki hat.
Haba kren sha ki lad pathai khubor, u Bah Donbor Marbaniang, uwei na u nongri syiar, u la ong ba ki nongri syiar na Ri Bhoi ki da kyrpad jur ia ka sorkar jylla lyngba ka tnad Veterinary ba kin shim khia ia kane ka kam ban tehlakam ia ki syiar kiba wan nabar ba kim dei ban die tad ia ka dor jong ki syiar, ba kane ka ktah pat ia ki nongri syiar na kane ka District bad ka jylla.
U la ong ruh ba ki nongri syiar na RI Bhoi ki kyrpad ia ka sokar ruh ban buh ia kita ki khyrdop lane ban pyntreikam ia kita ki khyrdop ba la don lypa na ka bynta ban tehlakam ia ki syiar kiba wan na shabar ba kim dei ban ban die ia ki syiar ha ka dor kaba tad bad ka dor ka mur ka dei ban ia ryngkat ba ka dor jong ki nongri syiar na kane ka district khnang ba kan nym pyniap ia ki nongri syiar na kane ka District bad ka jylla.
Ha kawei ka bynta, u la pynpaw ruh ba kum ki nongri syiar kim banse ban mih madan ban pynpaw ia ka jingsngewkhia sha ka sorkar lyngba ki lad pathai khubor, ka daw ka long ba ki la shah ktah jur na ka jingiapher ki dor ki mur jong ki syiar ba wan na shabar bad ka dor jong ki nongri syiar na ka jylla ba kim lah satia ban pyniaid iew kaba dei hi tang na ka daw ka jingiapher jong ka dor ka mur, u la bynrap.
Â
