Nongpoh, Nohprah 29: Da ka jingiai bteng ban wad ia uwei u samla ba la jah na ka shnong Nongjri, kaba u la jah naduh ka 21 tarik u Nohprah 2024 khlem wan phai ing shuh, ki bor shnong bad ki paidbah kiba la lap ia ka met jong utei u samla ki la pyntip noh sha ki pulit na ka bynta ban pynlong ia ka jingtohkit halor kane ka jingiap une u samla.
Une u samla ba la jah la tip kyrteng kum u Pynshailang Malieh na ka shnong Nongjri bad halor kane ka jingjah la pynlong ia ka jingwad shnong la bun sngi mynta, hynrei dei haduh mynta ka janmiet la lap noh ia ka met jong u kaba la per ha ka wah hajan ka shnong Sohliya ba hap ha Umsning Police Station ha Ri Bhoi District.
Kumba la pyntip u Samla Pynshailang Malieh, u dei u samla ba don jingduna ha ka bor pyrkhat bad u la jah naduh ka 21 tarik u Nohprah 2024, ha kaba la pynlong ia ka jingwad shnong bad kumjuh ruh ki bor pulit bad dei mynta ka sngi ba la lap noh ia ka met jong u na katei ka wah.
La ioh lum jingtip ruh na ki bor pulit ka Ri Bhoi, la ong ba mynta ka sngi hadien ba la pyntip da ka bor shnong ba la lap ia ka met utei u samla, ki la leit ban pynlong ia ka jingtohkit na ka bynta ban shimti noh ia ka met jong utei u samla na katei ka wah, kaba dei hadien ba ki la tohkit bniah katkum ki kyndon jong ka ain.
Shuh shuh, ka tyllong khubor na ki pulit ka Ri Bhoi, la iathuh ruh ba ym don kino kino ka dak mong ne jingmynsaw ha ka met utei u samla, ha kaba la suba ruh ba ka lah ban dei kaba u la iap ngam jyllop bad ban tip ia ka daw tynrai ia ka daw ka jingiap la rah noh ia ka met sha Civil hospital Nongpoh ban pyndep ia ka postmortem examination.
