Nongpoh, Lber 22: Ka Raid Nongkharai ba hap ha ka Nongpoh Sirdarship mynta ka sngi ka la pynlong ia ka Dorbar Raid ba shisien shi snem na ka bynta ban ia kren halor shibun ki mat ba kongsan ban wan rah ia ka bha ka miat, ka shongsuk shongsain bad kiwei kiwei ki kyndon ba la buh da ka Raid na ka bynta kajingbit jingbiang ki paidbah hapoh ka Raid Nongkharai.
Ia kane ka Dorbar Raid la pynlong ha ïing Dorbar ka Raid Nongkharai kaba don ha ka shnong Jyntru ha ka la don ryngkat naduh u Lyngdoh Raid, u Bah Moses Syngkli, u Secretary Raid u Bah Stephan Maring, u Assistant Secretary ka Raid u Bah Vincent Makri, ki rangbah shnong bad kiwei kiwei ki nongialam shnong ba hap hapoh ka Raid Nongkharai.
Haba kren sha ki lad pathai khubor, u Bah Moses Syngkli, Lyngdoh ka Raid Nongkharai, u la ong ba ka Raid ka ju pynlong man la u snem ia kane ka Dorbar jong ka raid na ka bynta ban ia kren ia kiba bun ki kam kiba wan rah ia ka bha ka miat bad ka shongsuk shongsain jong ka shnong ka thaw jong ki shnong ba hap hapoh ka Raid Nongkharai.
U la iathuh ruh ba ki phang ba kham kongsan ba la ia kren ka long ban khang pyrshah ia ka jingthang khlaw ba ka pynjot ia ka mariang, ka jingpyniap ia ki mrad khlaw, ka jingpyniap ia ki doh um doh wah ba ka raid ka kwah ban pynneh pynsah bad ban iada kyrpang ia ka mei mariang.
“Nalor ka jingiakren ia ka shongsuk shongsain ki shnong ki thaw, la ia kren ruh ba ki shnong kin shim ia ki jingkitkhlieh ia ka rai ba la shim ha kane ka Dorbar bad ban khang ka jingdie jaka sha ki briew kiba nabar, ban thung dien bun ha ki khlaw shnong ban ioh jingim ki sim ki doh, ki mrad ki mreng bad kiwei kiwei ki mat kiba long ka jingiada na ka bynta ka pateng ban sa wan” ong u Bah Moses Syngkli.
Shuh shuh, u la ong ruh ba kum ka Raid ka angnud ban don ka jingiatylli hapoh ki shnong ki thaw ba hap ha kane ka Raid, namar lada don ka jingiatylli bad ka jingiatrei lang, kiei ki rai ba la buh da ka Raid lah ban pyntreikam bad ruh ban wan shibun ki jingkylla hapoh ka Raid khamtam ba ngi hap ban pyrkhat na ka bynta ka pateng ban sa wan ba ngi hap ban pynneh pynsah naduh ki riti ki dustur, ki jingdon jingem bad ki jinglong kyrpang kiba don hapoh ka Raid, u la bynrap/
