Umroi, Lber 23: Ka jingwan ther kynsan u phria mynta ka sngi ha ka thaiñ Umroi ka la pynjew mynsiem ia kiba bun ki nongrep, namar la sub aba bun na ki jingthung jingtep ki la shah pynjot ha u phria.
Kumba la ioh lum jingtip, la ong ba u phria u la hap kysan mynta ka sngi ha ka por 3 baje ei ei janmiet ha ka thaiñ Umroi. Kane ka jingjia ka la jia ha kaba dang shen ka Indian Meteorological department ka la dep pynbna lypa ba ka lah ban don ka jingkhie eriong bad hap phria na ka jingkylla ka suiñbneng ba kata ka lyer ba jur ka beh na ki bynta jong ka Bay of Bengal.
Haba pyrshang ban lum jingtip halor kane ka jingther u phria, la ong ba kane ka jinghap u phria ka la neh kumba katto katne minit bad la suba ba ki jingthung jingtep ki lah ban shah ktah ha ki jaka rep, namar u phria u la hap haduh ba ki madan ki la lieh shaid da u phria.
Shuh shuh, la ong ruh ba kane ka jinghap u phria ka lah ruh ban don ka jingktah ia ki ïing ki sem bad ym haduh katta eh, namar u phria uba hap um da dei eh uba heh bad la shu hap da ki phria kiba rit kiba lah pat ban ktah ia ki jingthung jingtep.
Kumba la pynpaw, ha kine ki bnai bun na ki nongrep ki la thung ia ki sohsaw, ki sohmynken, ki salat, presbin bad kiwei kiwei ki mar rep, ha kaba mynta ki la sdang ban ioh kheit soh bad ym lah pat ban tip haduh katno ki nongrep ki shah ktah na ka jinghap kynsan u phria mynta ka sngi ha katei ka thaiñ Umroi bad ki shnong ba marjan.
