Nongpoh, Lber 22: Ka long ka khubor kaba kmen ban ioh sngew na kawei ka Longkmie kaba ai jingsumar tynrai, ha kaba lyngba ki sap kyrpang ba la ai da u Blei ki la don kiba pang ba shitom kiba phan ban wan sumar ia ka wat naduh ka ri USA.
Ia kane la pynpaw da ka Kong Aidaris Marbaniang haba kren sha ki lad pathai khubor mynta ka sngi, hadien ba ka la plie noh la ka jong ka jaka ai jingsumar ha ka shnong Mawpun Kshaid ha Ri Bhoi District.
Ia kane ka jaka ai jingumar kane ka longkmie la wan ban plie da u Rangbah Shnong ka Shnong Mawpun Kshaid, u Bah Bandari Ryntathiang ha ka jingdon ryngkat kane ka Kong Aidaris Marbaniang, ki nongialam shnong bad kiwei ruh kiba la koit na ka jingsumar jongka, kiba la phla shem mynsiem ha kane ka sngi, hadien ba ki la ioh ka jingkoit jingkhiah na ka jingsumar kane ka Longkmie.
Kumba la pynpaw da ka Kong Aidaris Marbaniang, ba ka la sdang ban ai jingsumar da ka jingsumar tynrai, ka dei naduh ba ka dang khynnah bad ba ka la hiar pateng na ka kmie jongka. Ka la ju sumar kylleng ka ri Khasi-Jaintia la bun phew snem mynta bad ha kane ka kynti ka la plie hi la ka jong ka jaka ai jingsumar.
Ka khubor ba la pynpaw da kane ka Longkmie kum ka nongsumar tynrai, ka dei ka jingsumar ym tang ia ki briew na kane ka jylla, hynrei la don ruh ki briew kiba pang bad kiba phah wan sumar naduh ka ri USA.
Ka la iathuh ruh ki jingpang ka ju sumar ki kynthup ia kiba pang BP, kiba pang iap shiliang, ki bym ioh khun shuh, kiba laitdoh, kiba kdiah bad ruh ban khem ia ki jingpang ba bun jaid jingpang da kaba ka pyndonkam tang da ki kymbat dawai khasi.
Na ka liang u Bah Bandari Ryntathiang kum u Rangbah Shnong u la ai ka jingkyrkhu kyrdoh ia kane ka Longkmie ba kan dang bteng ia ka jingai jingsumar sha ki paidbah ba pang ba shitom bad u kyntu ruh ia ka ba kan pyndonkam hok ia ka sap kyrpang ba la ai da u Blei.
Shuh shuh, u la ong ruh ka shnong ruh kan dang ai mynsiem ia kane ka Longkmie bad kan dang iai kyrshan ia ka, ba kan dang lah ban pyndonkam ia ka sap sumar ba la ai sap kyrpang da u Blei. U khmih lynti ruh ba kane ka Longkmie kan ioh ruh ka jingithuh da ka sorkar kumba ka la ioh pdiang shibun ki syrnod na ka sorkar halor kane ka sap kyrpang jong ka jingai symar tynrai ia kiba pang ba shitom da kaba sumar tang da ki kymbat dawai.
