Nongpoh, Nohprah 10: Hadien ba la bun phew snem mynta ki paidbah ka thain Umden ba hap ha Nongpoh Constituency ki la syrtok shisha ha ka leit ka wan na ka jingsniew ka surok bad ruh ba la mih ka jingkren bein sorkar pyrshah wat ia u Myntri ka tnad PWD, u Bah Mayral Born Syiem haba ai jingkren mynta ka sngi ha ka jingbuh ia u mawnongrim ban siang rong noh akane ka surok u la iam lung mynsiem ba ka jingangud ki paidbah ka la urlong wat hapdeng shibun ki jingtynjuh kiba u ia kynduh kum u Nongmihkhmat paidbah.
Haba kren mynta ka sngi ha kane ka jingialang buh mawnongrirm ia ka surok na Nongpoh-Umden kaba don ka jingjngai 20 km bad ruh ba la mang T. 49 klur lyngba ka state plan, u Bah Mayral Syiem ha ka jingai khublei kyrpang ia ka sorkar kynthup ruh naduh u Myntri rangbah, u Conrad K. Sangma bad u Myntri ka tnad PWD, u Bah Prestone Tynsong khlem poi pyrkhat u la iam lung mynsiem, kaba u dap ia kata ka mynsiem sngewkhiah namar bun ki la kren bein ia ka sorkar bad khamtam ia u Bah Prestone Tynsong kum u mytnri ka tnad PWD, bad wat la katta ruh ka sorkar ryngkat u myntri rangbah bad u Myntri ka tnad PWD kim sngap satia ia ka jingkynthoh ne kren bein ki paidbah bad ki la pyndep la ka kam ram ban pynurlong ia kane ka surok ka ban sa ai jingmyntoi ia ki paidbah ka thain Umden hi baroh kawei.
U la pynpaw ruh ia ka mynsiem jong ka jingkmen kum u Nongmihkhmat paidbah ka Nongpoh Constituency, namar ym tang kane ka surok na Nongpoh sha Umden ban sa siang rong noh bad wat ka surok na Umden sha Sonapur ban mih sha Byrnihat ruh ka sorkar kan sa siang rong noh lyngba ka jingmang tyngka na ka skhim PMGSY kab la kot sha ka T. 47 klur tam.
U la pynpaw ruh ba ka Nongpoh Constituency ka dang don shibun ki jingduna ba ki paidbah ki dang khmih lynti na ka sorkar bad u la buh ruh ka jingkyrpad ba ha ka jingialam u Myntri rangbah ka jylla u Conrad K. Sangma bad ruh u symbut Myntri ka sorkar u Bah Prestone Tynsong kin lah ban pynurlong khnang ba kan long shisha ka jingkyrkhu ia ki paidbah.
Ha kawei ka bynta, u la pan map ruh na u Bah Prestone Tynsong ba um dei ban sngap ia kano kano ka jingkren bein ne kynthoh pyrshah halor katei ka surok bad ka jingshisha ka la paw lyngba ki kam kumba la dep ban buh mawnongrim bad ban sa siang rong noh ia kane ka surok ban sa sdang noh shen ha u bnai Kyllalyngkor 2025.
Namar kata, u la ai khublei kyrpang ia ka sorkar jyla bad kynthup ia u Myntri rangbah bad ruh ia u symbut myntri ka sorkar ba kin dang bteng ka jingshakri na ka bynta ban wan rah ia ka jingkylla ym tang ha ka Nongpoh Constituency bad ha ka jylla hi baroh kawei bad ka jinglen jong ki kum ki nongialam ha kaba bun ki jingtynjuh kan long shisha ka jingkyrkhu bad ka jingkylla ha ka jylla hi baroh kawei.
