Nongpoh, Lber 27: Da ka jingsbun mynsiem u MLA ka Mawhati, u Bah Charles Marngar, ka la long ka jingkyrkhu ia kawei ka longïing baduk bad lah ruh ban ong ba kum kane ka kam kaba ym poi pyrkhat kam pat ju jia koit ha kaba u MLA u la pynshna ïing da ka tulop MLA ha kawei ka longïing baduk ha ka Shnong Umshiaw.
Kane ka longïing kaba la ioh pdiang ia ki jingkyrkhu ka dei ka longïing jong ka Kong Emilda Nongrum bad u Bah Clement Lyngdoh kiba don 4 ngut ki khun bad ka jingjaw ummat jong ka jingkmen ka la paw pyrthei ka dei ha ka 26 tarik u Lber 2025 ba u MLA ka Mawhati, u Bah Charles Marngar u la plie ia katei ka ïing ban aiti sha katei ka longïing ha ka shnong Umshiaw.
La sakhi lang ruh ha kane ka sngi, da ka jingdon lang u Tbn B. Shylla, u rangbah shnong u Bah Com Lapang bad ruh ki riew rangbah bad ki nongialam shnong ka shnong Umshiaw.
Kaba kham pynpang mynsiem, ka dei ruh ka jingjaw ummat katei ka Longkmie ha ka por ba u MLA u la aiti ia katei ka ïing kaba u la pynshna da kaba pynlut hi da ka tulop MLA.
Kum ban pynpaw, kum kane ka ïing ha ka shnong Umshaw ka dei ka sien kaba arb a u MLA u la iarap ban pynshna ïing bad ka sien kaba nyngkong kaba u la pynshna ïing ka dei ha ka shnong Liarbang kaba u la pynshna ïing ia ka longïing ka aKong Sunita Marbaniang bad u Bah Phardingland Wahlang ha ryngkat bad ar ngut ki khun kiba dang rit, ha kaba u la aiti ha ka step ka 22 Tarik Kyllalyngkot 2025.
