Nongpoh, Lber 28: Da ka jingkthang bad pang dohnud halor ka jingjia shah thombor jong kawei ka longkmie ha u runar ba la suba ngop ha ki jingdih buaid, mynta ka sngi na ka liang ki nongialam shnong ka Nongrah Pyllun, ki la pynlong da ka jingiaid paidbah ban pynrem jur halor katei ka jingjia bad ban dawa pynshitom tyngeh ruh ia u runar u ba la donkti ha kaban thombor ia ka longkmie kaba dang armet.
Lah ban kdew, ba ha ka step jong ka 19 tarik Lber 2025, ha ka por 8 baje eiei, kawei ka longkmie kaba dang armet ba la tip kyrteng kum ka Ellana Lyngdoh Mawphlang ka la shah thombor bad shah pynmynsaw da ki kynja tiar ba neb katba dang thmu ban leit sha ka jaka trei hapoh ka Umroi Airport, ha kane ka jingjia u runar ba la tip kyrteng kum u Kyrshanlang Marngar na ka shnong Rudwah Nongrah Umroi u ba la patan ia katei ka longkmie bad knieh ia ka pla kieng ka jong ka, ia kane ka longkmie la rah marmar sha Bhoirymbong CHC hynrei namar ki jingmynsaw kiba jur la pynkynriah noh sha NEIGHRIMS hospital.
Halor katei ka jingjia, na ka liang ka shnong Nongrah Umroi ka la pynlong da ka jingiaid paidbah ban pynrem jur ia kane ka jingjia, ha kaba la lamkhmat da u Rangbah Shnong Bah P. Dkhar, lem, u Chairman : Bah GS Kharlor, Rangbah Dong Bah A Khymdeit na ka liang ka seng longkmie la donlang ka Kong T Makhroh, lem bad ki khynnah skul na ki saw tylli ki skul kiba don ha ka shnong Nongrah.
Na ka liang ki nongkren ki la pynrem jur ia katei ka jingjia shah thombor jong ka longkmie kaba la pynshong syier ia ki khyllung khynnah ka dong ka thaiñ da kaba kyntu ia baroh ki nongshong shnong ban ia tylli lang kawei ban rad dyngkhong ia kum kine ki jingsniew ban wanrah ia ka jingshong shngain hapoh ka shnong ka thaw.
Shuh shuh ruh, ki la kyntu ruh ia ki bor ba dei peit jong ka sorkar ban pynduh jait ia ki jingdih buaid kiba la pynjot ia ka imlang ka sahlang khamtam ia ki khun samla, ki la bynrap da kaba ai khublei ruh ia ka tnat jong ki pulit kiba da ka jingtreishitom ki la ioh ban kem noh ia u runar ba la donkti ha ka ban thombor ia katei ka longkmie.
