Nongpoh, Lber 27: Kum uwei u samla uba pyrshang ban ieng ha la ki jong ki kjat ban seng kam seng jam ha kum kane ka pyrthei kyrduh kam kyrduh jam, u Samla Shabor Marbaniang na ka shnong Umling, u la buh syndon ia ka jingdawa na ka Khasi Hills Autonomous District Council (KHADC) ba ka hap tehlakam ia ki bar jylla kiba ym don trading bad labour license kiba wan ban seng kam seng jam sha kane ka jylla.
Une u samla u la mih shakhmat ban kren halor ka jingdonkam ba tehpyrkhing ia ka Trading bad Labour License, ka dei halor ka jingwan poi ki briew kiba na bar jylla ban buh khlieh wat ia ki kam ba dang lah ba leh da ki samla trai jylla.
Haba ia kren sha ki lad pathai khubor, u Samla Shanbor Marbaniang, u la ong ba kum u samla u bym don kam don jam ban kyrshan ia ka ïa ka ïing ka sem, u la pyrshang ban seng kam da ka ba plie ka dukan dukan thied mar jot bad kaei kaba shah ktah ka long ba ki briew ba na shabar kiba wan na ka jylla Assam ki wan rah da ki Kali ban thied ia ki major mar pei khlem da don ki trading bad labour license.
U la ong ruh ym tang ba ki wan ban knieh jyndat ia ka jakpoh ki samla kiba thrang ban ieng ha la ki jong ki kjat da kaba seng ia kitei ki jaid kam, hynrei kine ki briew na Assam ki rung sha ki shnong ki thaw ban thied ia ki mar jot mar pei kaba long ka jingma ia ki kynthei ki khynnah ba don napdeng jongki kiba ju dih buaid bad dih drok khlem da don ka jingithuh na ki bor ba dei peit ka sorkar.
“ Ha ka jingshisha haba ki wan na shabar ka jylla ban bsuh khlieh ha kitei ki jaid kam, ki la dei ban iohi bor na ka bor shnong bad ban don ruh kata ka Trading bad Labour License na ka KHADC bad ka long pat kaba sngewlyngngoh ba ki shu wan rung suk ban knieh ia ka kam ka jam kaba dang lah ban leh da ki samla trai jylla” ong u Samla Shanbor Marbanaing.
Shuh shuh, na ka liang une u samla, u la kyrpad ia ka KHADC ba ym dei tang ban tehlakam ia ki briew kiba wan seng kam seng jam ha kane ka jylla da kaba pynlong ia ka jingkhynra na ka por sha ka por, hynrei ka KHADC ka hap ban sangeh ruh ban ai ia ki Trading bad Labour License ia kum kine ki jaid kam kiba dang lah ban leh da ki samla trai jylla, u la bynrap.
