Nongpoh,Nailar 6: Ki nongialam jong ka Synjuk ki Rangbah Shnong Nongkhrah Nonglyngdoh (SRSNN), ka shnong Mawroh lem bad ki ophisar na ka tnad PWD mynta ka sngi ki la pynlong ia ka jingjurip ia ki bynta jong ka surok kaba hap ha ka shnong Mawroh kaba la khim palat bad la donkam ban pynheh noh na ka bynta ban pynsuk ia ki paidbah nongleit nongwan. Ha kane ka jingjurip, la wan ban synran lang ruh da u MLA jong ka Nongpoh konstitwensi, u Bah Mayralborn Syiem.
U Bah Livinstone Pamshong, Chairman jong ka Synjuk bad u Bah Opel Lyngdoh, Rangbah shnong ka Mawroh, ki la iathuh ba kane ka bynta jong ka surok kaba don hakhmat jong ka Inspection Bungalow (IB) ka tnad PWD kadei kaba ki paidbah nongrep ka thain ki ju pynhap ia ki mar rep ki jong ki ban pynpoi sha ki iew ki hat bad ruh kadei ka surok kaba la pyndonkam da kiba bun tylli ki shnong.
Ki la pyntip ruh ba katei ka bynta jong ka surok, ka la khim bad khapniah shaba palat khamtam ha ka por mynstep bad janmiet kaba la ktah bad buh jingeh ymtang ia ki paidbah nongleit nongwan, hynrei wat ia ki khynnah skul ruh kiba hap iaid lyngba katei ka surok.
Kitei ki nongialam ki la iathuh ba la donkam ban pyniar ia ka jingheh jong katei ka surok la kumno kumno ruh kumba 3 meter eiei sha baroh ar liang ki bynta jong ka surok kiba dei ki jaka jong ka tnad PWD bad ruh jong ki riew shimet, khnang ba ki paidbah kiba nongleit nongwan, ki nongrep bad ruh ki khynnah skul kin suk ia ka leit ka wan.
Shuh shuh, kitei ki nongialam, ki la pyntip ruh ba ki la dep ban iakren bad ki bor ba dei khmih jong ka sorkar halor kane ka bynta, da kaba ai ruh ia ka jingkhublei kaba kyrpang sha u Bah Mayralborn Syiem, MLA ka Nongpoh konstitwensi halor ka jingshimkhia ka jongu ban iarap pynkren sha ka sorkar halor kane ka bynta khamtam ban pynurlong noh kham kloi ia kane ka kam.
