Nongpoh, Jymmang 23: Da ka jingthmu ban pynioh da ka jingtei babha bad kaba janai hapoh ka Iew die kwai bad tympew ha 15mer, Byrnihat, hynne ka step u Bah Sosthenes Sohtun, MLA Jirang ha ryngkat u Bah H. Dohling, Assistant Director ka Horticulture Nongpoh lem bad kiwei ki ophisar sorkar, ki la leit ban jurip ka katei ka Iew, na bynta ban shna pat da kawei ka Iew kaba paka, khnang ba kan pynsuk ia ki nongshong dukan hapoh katei ka Iew, kaba dei ruh ka Iew ba them bha ka die kwai bad tympew ha ki por mynstep.
Lyngba katei ka jingleit jurip, u Bah Sosthenes Sohtun, haba kren sha ki lad pathaikhubor, u la ong ba katei ka jingleit jurip kaba la donlang ki ophisar bad nongialam shnong, ka long ban ia pyrkhat bad thawlad ba kumno yn shna pynbha ia katei ka Iew.
Shuh shuh, u la ong ruh ba ngi leit ban jurip khnang ia katei ka Iew, ka long ban shna pynbha da ki jingtei ba kham bha, namar katei ka Iew, ka la long kum kawei na ki Iew ba la don nam, ha kaba ka Iew ka dei kaba sdang naduh ka por 2 ne 3 baje mynstep, ha kaba ka thnem bha ha ka rukom die kwai bad tympew, hapdeng ki nongkhaii na Assam bad Meghalaya.
