Shillong, May 23: Ka lympung ialehkai sport jong ka State Level Inter School Athletic Meet, kaba lai sngi lynter la pynhap pyrda noh ha ka 22 tarik u Jymmang 2025, ha kaba ka kynhun ialehkai jong ka East Khasi Hills District ka la ioh ban khur ia ka nam kum ka lahduh kane ka Overall Champion ha kane ka lympung ialehkai sport.
Ha kane ka lympung ialehkai sport kaba la pynlong hapoh ka Sports Authority of India (SAI), NEHU, Shillong la pynlong da ka tnat ialehkai jong ka Directorate of Sports and Youths Affairs ha ka jingiatreilang ruh bad ka Meghalaya Athletics Association, la sakhi ia ka jingiashimbynta kaba shitrhem da palat 780 ki nongiashimbynta kiba la mihkhmat na ki 12 districts jong ka jylla Meghalaya.
Ha kane ka lympung ialehkai sport ka kynhun jong ka East Khasi Hills ka la ioh rah ia ka nam kum ka overall champion da kaba khur haduh 23 Gold, 11 Silver and 8 Bronze medals bad khur ruh ia ka nam best team ha ka liang ki shynrang bad kynthei da kaba khur 10 Gold medals, ha ka liang ki kynthei ka nam best team la rah da ka EKH da kaba khur 13 gold medals.
Ka kynhun ba wan baar ha ka kyrdan ki shynrang la rah da ka East Jaintia Hills da kaba khur 5 tylli ki gold bad ha ka liang ki kynthei pat la rah da ka North Garo Hills da kaba khur 3 tylli ki gold medals.
La wan ban pynhap pyrda ia kane ka lympung ïalehkai sport da u Myntri ka tnad pule puthi ka jylla u Rakkam Sangma, Education Minister kum u kongsan ha ka jingiadonlang ruh u D. D Shira, MCS, Director, Sports & Youth Affairs department, P B War Nongbri, Additional Director, Sports and Youth Affairs department, K Passah, Assistant Director, Sports and Youth Affairs department, W L Warjri, Principal, Shillong Polytechnic Institute lem bad kiwei kiwei ki heh ophisar.
Na ka liang u Rakkam A Sangma kum u kongsan u la ai jingiaroh kaba khraw ia ki nongpyniaid ia kane ka lympung ialehkai sport kaba lai sngi bad ruh ban kitbok ia baroh ki kynhun kiba la iashimbynta khamtam ia ki kynhun bad ki nongialehkai kiba la lah ban khur ia ki namjop ha ki kyrdan bapher bapher.
U la pynpaw ruh, ba kum kane ka lympung ialehkai sport kan pynshlur shikatdei eh ia ki nongshimbynta kum ka jingpynkhreh ka jylla Meghalaya ban pynlong pat ia ka National Games 2027.
Na ka liang ki bor pyniaid kane ka lympung ki la sam ruh ia ki khusnam ha ki kyrdan ialehkai bapher bapher.
