Nongpoh, Jymmang 23: Ka Prime Meghalaya, kaba la pynmih da ka sorkar Meghalaya ha u snem 2019 ban kyrshan bad kyntiew ïaki nongsengkam lajong mynta ka sngi kala nang pyniar bad pynjan sha ki paidbah ban plie sa kawei pat ka ophis treikam ha Nongpoh Downgate kaba la tip kum ka ‘Prime Startup Hub’.
Ia katei ka tnad treikam jong ka Prime Meghalaya la wan ban plie paidbah da u Bah Jonathan Shylla, Additional Deputy Commissioner ka Ri Bhoi District kum u kongsan haka jingdonlang u Bah Keningstar Nongrum, Administrative Head ka PRIME Hub, u Pranjal Konwar, Chief Operating Officer ka IIMCIP, u Bah Sylvester Mynsong Rangbah Shnong ka Nongpoh, ka Merisha Toi Centre Manager ka Prime Hub Nongpoh, ki nongseng kam sengjam lajong bad kiwei kiwei ki riew rangbah.
U Bah Jonathan Shylla haba kren ha katei ka sngi kum u kongsan u la ai ka jingkhublei ba kyrpang iaka Prime Meghalaya kaba la shim ïa ka sienjam ban plie ïa kane ka tnad treikam ha Nongpoh bad kane ka dei ka kabu ïaki samla ka district ban long kum ka lad ban kyntiew ïaka sap bad pyniar ïaka kam ka jam jong ki namar watla bun ki samla kila pyndep ïaki jingpule bapher bapher hynrei ka long kaba eh ïaka sorkar ban pynbiang kam lut da ki kam sorkar.
