Nongpoh, Jymmang 22: U Myntri rangbah ka jylla Meghalaya, u Conrad K. Sangma mynta ka sgi da lade u la leit ban iuh kjat ia ka Shnong Pahamjula ba hap ha ka Jirang Constituency, kaba dei ruh kawei na ka shnong sha kyndon kaba la hap ban shongdum haduh 18 snem khlem ka bording Ilektrik, hadien ba u Transfomer u la bthei ha u snem 2007.
Kane ka jingleit jurip jong u, ka dei ruh hadien ka jingur jingnam na ki Nongshong shnong kiba don tang kumba 77 tylli ki tnum ïing bad mynta ka sngi da ka jingsynran lang u MLA ka Jirang u Bah Sosthenes Sohtun lem bad kiwei ki nongialam bad ki ophisar na ki tnad sorkar ki la leit ban jurip haduh katei ka shnong kaba la long ka jingkmen kaba khraw ia ki paidbah nongshong shnong ban ioh ka lad ha ka sien kaba nyngkong eh ban ia kynduh ia u Myntri rangbah ka jylla Meghalaya.
Naduh ki nongshong shnong, ki nongialam Shnong bad ha ka jingialam u MLA u Bah Sosthenes Sohtun, ki la ai khublei kyrpang ia u Myntri Rangbah ka jylla, u Conrad K. Sangma ha kaba tang ha ka Sngi Tohdieng ba la dep ki la kynduh ia u Myntri Rangbah bad mynta da ka jingshim khia u Myntri rangbah la lah ban maramot noh ia u Transformer ba ki paidbah ki la ioh biang ia ka bor jingshai hadien 18 snem ba la sniew utei u transformer.
Ki nongshong shnong da ka jingieit ki la pdiang burom ia u Myntri rangbah bad ka jingwan poi u Myntri rangbah ka jylla ka la long ka jingai mynsiem ia ki, ha kaba ki la batai halor ka jingbym ioh bording ilektrik bad mynta ba la lah ban maramot ia u Transformer ki la sngew kumba la lait ksuid ba la ioh biang ia ka bording ilektrik.
Kane ka jingleit iuh kjat u Myntri Rangbah ka jylla, ka dei ruh shi bynta halor ka ‘CM Connect Impact’, kaba dei ka thong jong ka sorkar jyllaban wan rah ia ki kam pynroi shaduh ki shnong nongkyndong bad ruh ban tip kham bha ia ka jingeh ki paidbah ha ki shnong Nongkyndong.
Haba kren ruh ha kane ka sngi, u Myntri rangbah ka jylla, u Conrad K. Sangma u la kren shai ba ka sorkar kan sngap ia ka sur ki paidbah bad kino kino ki jingeh ba ki paidbah ki ia kynduh ka sorkar kan shim khia kata naduh ki jaka sor shaduh ki shnong ba kyndong tam jong ka jylla.
U la ong ruh ba u dap da ka mynsiem jong ka jingsngewkmen kaba khraw ba u la ioh ban ia kynduh ia ki nongshong shnong ka Pahamjula, ha kaba wat la ka dei ka shnong kaba rit bad kaba don jingmut pat lyngba kane ka jingiakynduh lang.
Shuh shuh, u la bynrap ruh ba ka long kaei kaei ka jingkmen hapoh ka mynsiem ba hadien 18 snem ba la duh ia ka bording ilektrik, kane ka shnong ka la ioh biang ia ka bor jingshai, kaba dei da ka jingshim khia u MLA ka Jirang bad ma u ruh kum u Mynti rangbah uba la kloi ban phai khmat sha kane ka shnong kaba don sha kyndong hapoh ka Jirang Constituency.
Na ka liang u MLA ka Jirang, u Bah Sosthenes Sohtun ruh kum u Nongmihkhmat paidbah u la ai khublei kyrpang ia u Myntri rangbah ka jylla, uba la shah skhor bad uba la pynrit ruh ia lade ban leit jurip sha katei ka shnong kaba dang hap ban iaid kjat bad ruh ba ka jingwan poi u myntri rangbah ka jylla ka la long ka jingai mynsiem ia ki paidbah sha kitei ki shnong nongkyndong.
