Shillong, Lber 03: “Ngan long uwei na u ba kmen eh ha ka jingim, lada ka sorkar Meghalaya ka lah ban pynurlong ia ka jylla ban poi sha kata ka thong 10 billion Dollar economy ba ka sorkar ka la buh thong naduh u snem 2028,” ong u Bah Ardent Millar Basaiawmoit, MLA ka Nongkrem haba shim bynta ban ia tai halor ka jingkren u Lat ka jylla (Governor address) ha kane ka dorbar mang tyngka jong ka sngi ka baar jong u snem 2025 kaba la sdang ha 28 tarik u Rymphang 2028.
U Bah Ardent Millar Basaiawmoit u la pynpaw ba u kmen eh lada ka sorkar ka lah ban pynurlong kum kata ka 10 million dollar economy ia ka jylal Meghalaya bad u la buh pat ia ka jingartatien halor ka jinglong jingman hapoh ka jylla ba naei ka sorkar jylla ka lah ban ioh ia kata ka pisa ban pynkylla ia ka jylla Meghalaya sha kata ka 10 Million Dolar Economy.
Kum u nongmihkhmat paidbah,u Bah Adent Millar Basaiawmoit u la kren ruh ba ka sorkar kam dei ban shu put turoi ne tang ban pynsngew sha ka shkor ka sorkar ba kan buh ia katei ka thong, hynrei shuwa ba shim rai dei ban da tih bniah ne ban bishar bniah namar kumba long haduh mynta kiba bun hi ki kam pynroi ki dei na ka sorkar kmie bad ka sorkar jylla ka dei tang ka nongpyntreikam (Implmenting agency).
Haba kren halor katei ka 10-million Dollar economy, u Bah Ardent Millar basaiaw u la ong ba sa katno ka sorkar kan ioh ban shim rai na ki Bank bapher bapher bad katkum ka CAG report ka jingshim ram ka sorkar (State borrowing trend) ka la poi sha ka 63% ha kaba kane ka la buh lypa ka jingma (Death trap) ia ka jylla.
Shuh shuh, u la kren shai ruh kumba long haduh mynta ka sorkar jylla ka hap ban shaniah ha ka sorkar pdeng ia kiba bun ki kam pynroi bad ka la don ruh ka jingmaham ka sorkar pdeng ba lada ka sorkar jylla kam lah ban pyntreikam ia kita ki kam pynroi ka hap ban pynphai kylla ia ka pisa bad ha kum kane ka ia kaei ka ban jia ia ka jylla.
