Nongpoh, Ïaïong 14: Ka Balawan College Umsning kum kawei na ka shlem ai jingnang jingstad ïaki samla pule ka Ri Bhoi, ka la pynkut noh mynta ka sngi ïa ka jingïakop ïalehkai Badminton ba la pynlong ha phyllaw katei ka College, ha kaba la buh ruh ïa ka phang, “”Swing Together, Win Forever”, kaba ki la ban khia ïa ka dor jong ka jingïatylli, ban don ka mynsiem ïalehkai sport bad ban don ïa ka thong ha ka jingim.
Ïa kane ka jingïakop ïalehkai Badiminton la wan ban pynhap pyrda da u Bah David Lyngdoh, uba dei uwei u nongthoh kot bad u rangbah ba la paw ha ka jylal bad la sakhi lang ruh da ka jingdon lang u Fr. Dr. L. Kharluni, Principal ka Balawan College, ryngkat ki samla pule bad ki nongtrei katei ka Balawan College.
Ha kane ka jingïakop ïalehkai Badminton la shim bynta naduh ki samla shynrang bad kynthei, ha kaba ki la ioh ïa ka lad ban pynpaw ïa ka sap kaba ki don ha ka jingïalehkai badminton. Ha kane ka sngi la sam ruh ïa ki khusnam sha ki nongjop ha ki kyrdan bapher bapher jong ka jingïakop Badminton.
Haba kren ruh ha kane ka sngi, u Bah Lyngdoh u la ban khia ïa ka jingkordor jong ka jingïalehkai sport kaba ai ïa ka jingkoit jingkhiah bad ka long ruh shi bynta ban wan rah ïa ka jingïatylli hapdeng ki khun samla.
Na ka liang u Fr, Dr. Kharluni u la ai khublei ïa ki samla pule kiba la shim bynta ha kane ka jingïakop ïalehkai Badminton wat la ka long shabar na ka jingpule bad ka long pat ka jingmyntoi ïa ki khun samla ba kin ioh ïa ka lad ban sei madan ïa ki sap ki phong.
Shuh shuh, u la ai khublei ruh ïa u Bah Lyngdoh uba la wan ban shim bynta kum u kongsan ha kane ka sngi bad u khmih lynti ruh ba nangne shakhmat kan don ka jingïatrei lang ha kaba kyntiew ïa ka pule ka puthi bad kumjuh ruh ïa ki sap ki phong ki samla ha ki kam ïalehkai sport bapher bapher.
