Nongpoh, Lber 29: Ka long shisha ka jingkmen ia ki nongialam ka Raid Nongpoh kata naduh u Lyngdoh bad ki longsan ki man san ka Raid, ha kaba mynta ka sngi na ka liang u Deputy Chief Minister ka sorkar jylla, u Bah Prestone Tynsong, u la kular ban pyniong noh ia ka surok sha ka jaka leh niam shad sajer ka Raid Nongpoh kaba don ha u Lum Wyrtoh lyngba ka song jingiarap kaba T. 5 klur duna.
U Bah Prestone Tynsong kum u Deputy Chief Minister ka sorkar jylla mynta ka sngi u la leit ban shim bynta kum u kongsan ban sakhi ia ka tamasa shad Sajer ka Raid Nongpoh ba la pynlong ha lum Wyrtoh bad la don ryngkat ruh u MLA ka Nongpoh, u Bah Mayral Born Syiem kum u symbut kongsan.
Kiwei kiwei kiba ia sakhi lang ha kane ka sngi ki kythup ia ka MDC ka Nongpoh, ka Kong Rona Khymdeit, u Deputy Commissioner ka Ri Bhoi, u Abhilash Baranwal, u Lyngdoh ka Raid Nongpoh, u Bah Linus Lyngdoh, ki nongialam shnong bad kynthup ki khun ki hajar ka Raid.
Nalor ka jingpynphuh pynphieng da ki jingshad tynrai bapher bapher da ki khun samla ka Raid, ha kane ka sngi, ka la dang pynkmen ia ka Raid, ha kaba u Symbut Myntri ka sorkar jylla lane u Deputy Chief Minister ka sorkar, u Bah Prestone Tynsong, u la kular ban siang rong ia katei ka surok kaba don tang kumba 2 km na ka surokbah National Highway-6 ban iaid lyngba ka shnong Pahamsyiem.
Kumba la pynpaw da Lyngdoh Raid, u Bah Linus Lyngdoh, ka jingthmu ba la pynlong ia kane ka tamasa shad sajer kam da dei eh than tang ban lehkmen leh sngewbha, hynrei ka dei kawei na ka thong ban pynneh pynsah ia ki riti ki dustur ka Raid kumba la ialam naduh ki mynbarim.
U la ong ruh ka Raid ka dong ia ka thong ban dang pynneh pynsah ia kane ka shad sajer ha katei ka jaka kyntang ka raid kaba don ha u Lum Wyrtoh bad dang donkam pat shibun ki lad jingiarap na ka sorkar ban dang pynjanai ia katei ka jaka bad ka jingkular u symbut myntri ban ai surok ka long kawei na ka jingkmen kaba khraw ia ka Raid ba kan dang lah ban pynkhieh im ne ban pynneh pynsah ia la ki riti ki dustur.
Ha kane ka sngi, la ai jingkren ruh naduh symbut myntri rangbah ka jylla u Bah Prestone Tynsong, u MLA ka Nongpoh, u Bah Mayral Born Syiem, ka Kong Rona bad kiwei, ha kaba ka sur kaba mih na ki, ka long ban don kata ka jingiatrei lang ym tang ha kaba pynneh pynsah ia ki riti ki dustur bad ban ia trei lang na ka bynt ban kyntiew ha baroh ki bynta jong ka long briew ka man briew.
