Nongpoh, Lber 29: U Deputy Commissioner ka Ri Bhoi, u Abhilash Baranwal ha ka 27 tarik u Lber 2025 u la sdang ban pyntreikam ia kawei na ka prokram kyrpang ba la tip kum ka ‘Community Interaction Program” da kaba sdang shwa na Jirang C&RD Block ha Ri Bhoi District.
Kane ka prokram ba la plie nyngkong eh na Jirang C&RD Block, ka dei ka prokram kyrpang ba la wan rah da u Deputy Commissioner ka Ri Bhoi, ha kaba yn pyntreikam ha baroh ki C&RD Block kiba don ha Ri Bhoi District bad ka thong ka long ban leit sha ki paidbah ban tip kyrpang ia ka jingeh bad ki jingdonkam kiba ki donkam na ka sorkar.
Ia kane ka prokram la pynlong ha ophis u Block Development Officer ka Jirang C&RD Block ha kaba u Deputy Commissioner ka Ri Bhoi, u Abhilash Baranwal u la shim bynta kum u kongsan ban plie paidbah ia kane ka prokram ha ryngkat ka jingdon lang u BDO ka Jirang, u P. Hajong, ki ophisar na ki tnad trikam sorkar bapher bad ki nongialam shnong bad ki nongshong shnong ba hap ha ka Jirang C&RD Blok jong ka Patharkhmah Civil Sub Division.
Lyngba ka CM Connects, ka jingthmu kane ka prokram ka long ban ia thir markhmat bad ki nongialam shnong ne ki paidbah ba kin pynpaw ia ki jingdonkam jongki bad ruh ban pynthikna ba kin ai jingtip sha ka ophis u BDO bad sha ka ophis u Deputy Commissioner khnang ban lah ban rah pat sha ka sorkar jylla.
Ki phang pdeng kiba la ia kren ne ia tai ha kane ka sngi ki kynthup naduh ka kam ri jingri, ka surok bad ka Mobile Network, ka bording ilektrik, ki jingeh ha khappud, ka umbam ka umdih lyngba ka JJM, ki skul, ka koit ka khiah bad kiwei kiwei ki jingdonkam jong ki paidbah.
La pynsngew ruh ha kane ka sngi hakhmat u DC ban don noh ki ophis treikam ki Village Organization, ban pynbit pynbiang ia ki lynti iaid paidbah ne ki jingkieng iaid paidbah bad la dawa ruh ban don noh ka ophis treikam ka Fire and Emergency Services Station ha Jirang, ba u Deputy Commissioner u la kular ban shim khia ia kitei ki mar ba la wan rah da ki paidbah.
Haba pyntreikam ia kane ka prokram kyrpang ban tip ia ka jingeh ki paidbah, u Deputy Commissioner ka Ri Bhoi, u Abhilash Baranwal u la ong ba ka bor synshar District kan buh ia ka thong ban sngap ia ki jingeh ki paidbah bad ban pynsuk ia ki paidbah la buh ruh ia ka Helpline ba ki paidbah kin phone ha une u numer 8131811911, ban ailad ia ki ba kin pyntip ne ujor ia ki jingdonkam bad ruh ban pynpoi lyngba ki jingthoh sha ka ophis u BDO ne sha ka ophis jong u ha Nongpoh.
Ha kane ka sngi, na ka liang u Deputy Commissioner ka Ri Bhoi, u Abhilash Baranwal, u la pynthikna ruh ba ia kane ka prokram yn pyntreikam ha baroh ka District bad un dang leit jurip ha man la ki C&RD Block.
