Nongpoh, Iaiong 01: Ka Confederation of Ri Bhoi People (CoRP), ka la mih shakhmat ban pyrshah jur halor ka jingthied jaka ka Meghalaya Industrial Development Corporation (MIDC) ha ka shnong Umsiang, kaba ka shnong khappud ka Meghalaya bad ka Assam.
Haba kren shad ki lad pathai khubor, u Working president ka CoRP, u Bah Pateng Myrsing, u la ongba ka seng ka pyrshah jur ia kane ka jingthied jaka ka MIDC ia ka jaka kaba la kot 300 Akar bad ha ka dor kaba la poi sha ka T. 100 klur.
U la ong ka seng ka la mih ban pyrshah halor kane ka bynta, ka dei hadien ba ka la ioh jingtip ba ia kane ka jingthied jaka ka MIDC la shu leh sop sop tang da ki rangbah shnong bad u Syiem kiba la ai sop sop ia ka NOC khlem da pyntip sha u paidbah bad na ka liang ka seng kan nym ailad ia kine ki kam leh sop sop kumba la paw hadien ka jingthmu pynkylla ia ka Soil and Water Conservation Byrnihat sha kata ka jaka ban buh ia ki Karkhana ka MIDC ka la hap phai khmat noh sha thain Umsiang hadien ba la pyrshah jur da ki paidbah ka thain Byrnihat.
U la ong ruh ba ka jingdon ka Karkhana ha Byrnihat bad Umiam ka ai jingmyntoi satia ia ki trai muluk ki trai jaka bad ka jingmyntoi ka leit sha ki bar jylla bad kaei kaba ki padibah ki mat ka dei ka jingma ia ka koit ka khiah kumba la ioh nam ba ka Byrnihat ka la ioh ia ka nam ba jaboh tam ha ka pyrthei. Namar kata, ka seng ka dawa na ka sorkar ban sangeh ia kane ka jingthied jaka ka MIDC sha ka thain Umsiang bad lada ka sorkar kam sngap ka seng kam banse ban mih bad ban ia khih paidbah, u la bynrap.
Shuh shuh, u la pyntip ruh ba ka seng ka la dep ruh ba ujor da ka RTI sha ka ophis ka MIDC halor kane ka kam thied jaka bad hadien ba la ioh ia ka jubab ka seng kan sa pynshai sha ki paidbah bad kan ieng pyrshah ruh ban nym ailad ban theid jaka da ka MIDC ban pynlong kum kata ka jaka ki Karkhana kaba ki trai jylla kim ioh jingmyntoi bad ka jingmyntoi ka leit tang sha ki bar jylla, u la bynrap suh shuh.
