Nongpoh, Lber 24: Ka Dorbar Shnong Mawpun Kshaid mynta ka sngi ka la leit ban ia kynduh ia u Deputy Commissioner ka Ri Bhoi District u Abhilash Baranwal bad ban aiti ruh da ka dorkhas ha kaba ia dei bad ka jingdonkam ban iada ia ki tyllong Umdih umbam na ka thmu ban tei ia ka surok Fourlane lane ka Over High Speed Corridor.
Ha kane ka jingiakynduh ia u DC, la lamkhmat hi da u Bah Bandari Ryntathiang, Rangbah Shnong ka Mawpun Kshaid, u Bah Synrap Nongrum Secretary Shnong nalor kiwei kiwei ki nongialam shnong.
Haba kren bad ki Nongthoh Khubor, u Bah Bandari Ryntathiang, u la pynpaw ba na ka liang ka Dorbar Shnong ka Mawpun Kshaid kam don kano kano ka jingpyrshah halor ka jingwan jong katei la surok Fourlane ka ban iaid lyngba na u Lum Sohpetbneng hynrei kum ka shnong ka don pat ia ka jingsngewkhia ioh kane ka surok kan ktah pat ia ki tyllong umbam umbam ha ki khyndiat snem kiban sa wan.
U la ong ruh, ba watla katei ka surok Fourlane kaba la sdang ban tei kan jngai kumba 140 meter eiei na ki tyllong umbam umdih, hynrei ha kane ka jingiakynduh ia u DC na ka liang ka Dorbar Shnong hi ka la pan da ka jingkular kaba skhem ba katei ka surok un nym ktah ia ki tyllong Umdih ha ki san ne shiphew snem kiban wan namar ka jingtuid jong ka khyndew kaba ka kompani kan tih ha kaban tei ia u ne u surok.
Na ka liang u Deputy Commissioner, u Abhilash Baranwal hadien ka jingiakynduh bad ki nongialam shnong ka Mawpun Kshaid, u la kular ban wad bniah halor kane ka bynta ban pyntikna ruh ba ka jingtei ia kane ka surok kan nym ktah shisha ia ki tyllong umbam umdih.
