Nongpoh, Lber 24: Da ka jingiai bteng ka kynhun SDRF bad ka Fire & Emergency Services bad ruh ki Pulit na Ri Bhoi la lap noh ia ka met jong u rangbah, uba la leit ban noh iap ha ka jingkieng heh ha Umiam.
Kum ban pynkynmaw, une u rangbah la pyntip ba u la leit ban kynthih shapoh ka pung hynnin ka sngi U Blei ha ka por 1.50 ei ei bad wat kiba haïing ki la pynthikna, hynrei hapdeng ka wad ia ka met ym shym la lap satia.
Katkum ka khubor ba la ioh lum na u heh pulit ka Ri Bhoi, la ong ba dei lyngba ka jingiai bteng ban wad ia ka met da ka kynhun SDRF bad Fire & Emergency Services bad ruh ki Pulit na Ri Bhoi, ia ka met une u rangbah la lap noh mynta ka sngi.
La iathuh ruh ba une rangbah la tip kyrteng kum u Pritish Deb, uba shong basah ha Laban, Kench’s Trace, Shillong. U dei ruh u trai jong ka dukan electronics kaba don ha Last Stop, Laban.
Shuh shuh, la ong ruh hadien ba la lap ia ka met jong u, la leh katkum ki kyndon ka ain bad na ka liang ki pulit ki dang pynlong ruh ia ka jingtohkit ban tip ia ka daw tynrai ka jingleit noh iap une u rangbah ha katei ka pung umiam, ong ka khubor ba la ioh lum na ki Pulit ka Ri Bhoi.
