Shillong, Lber 25: Kum ka jingbteng ban ia khun thma pyrshah ia u drok bad kiwei kiwei ki kam sniew kiba don ha ka imlang ka sahlang, ka DREAM ka la pynlong da ka jingai jinghikai kaba kyrpang ia ki VDP, ki nongialam shnong, ki Seng Longkmie, ki Seng Samla ba la pynlong ha ka 24 tarik u Lber 2025 ha Conference Hall ka Directorate of Social Welfare, Lachumiere, Shillong.
Ka jingialang ka la long kum ka rynsan kaba kongsan ban iakren ia ki bynta bad ki jingtreikam jong ki VDP ha kaban tehlakam ia ka jingdih drok bad ki kam runar kiba iadei bad u drok ha ka Distrik bad ka nongbah Shillong baroh kawei.
Ha kane ka prokram la don ryngkat ruh u Bah Vivek Syiem, Superintendent of Police, East Khasi Hills Distrik, ha ryngkat U Honorary Adviser jong ka VDP, ki ophisar ka Social Welfare, Anti-Drok, ki nongkitkam jong ka DREAM bad ki nongmihkhmat bapher bapher jong ka imlang sahlang, kynthup ïa ki Rangbah Shnong, ki Seng Longkmie, bad ki Seng Samla. Ki nongialam jong ki kynhun VDP bapher bapher na kylleng ka East Khasi Hills Distrik.
Kumba 80 ngut ki nongiashimbynta na ki shnong/dong bapher-bapher bad ki VDP ki la sim bynta ban long kum ka rynsan ban ïamir jingmut kiba jur halor ki buit treikam bad ki jingpyrshang ban ïatreilang bad ban kyntiew ïa ka jingtreikam jong ki VDP ha kaban weng ïa ki jingeh kiba ïadei bad u drok bad ban wanrah ia ka jingshngaiñ ha ki shnong ki thaw. Ki nongiashim bynta ki la iatai, iathir bad ai jingmut ruh halor ki jingeh ba ki shem bad kumno ban wad lad, wad lynti ban teh lakam ia u Drok ha ki shnong ki thaw.
Ha ki jingiakren, ki la pynpaw ia ka jingdonkam jong ka jingiashim bynta lang jong ki paidbah, ka jingiatreilang bad ki bor pynjari ain, bad ki jingpynsngewthuh paidbah ha kaba ialeh pyrshah ia ka jingdih drok. U SP, Vivek Syiem u la ïaroh ïa ka jingpyrshang jong ki VDP bad ban pynkhlain ia ka jingïatreilang kaba neh bad ki lad ki lynti kiba shimkhia ban ïada ïa ki dong jong ka Distrik bad khamtam ka nongbah Shillong.
Kane ka jingpynlong ia kane ka prokram ia tai ne ia thir ka la pyni sa kawei pat ka mawjam ha ka jingiakhun pyrshah ia ka jingdih drok bad ki kam runar ha Shillong, da ka jingkut jingmut kaba thymmai na baroh ki nongshim bynta ban iatreilang na ka bynta ka imlang sahlang kaba kham shngain.
