Nongpoh, Lber 28: U Myntri Rangbah ka jylla Assam u Dr. Himanta Biswa Sarma mynta ka sngi u la poi ban ia shimbynta ha ka passing out parade ban pynkup burom ia ki 70 ngut ki pulit ophisar kiba la pyndep ia ka training kaba pura na bynta ka kyrdan Deputy Superintendent of Police ha ka prokram jong ka 54 Basic Cource Training ba la pynlong hapoh ka North East Police Academy (NEPA) ha Umsaw.
Ha kane ka sngi, la ia donlang ruh u Director ka NEPA u Danesh Rana (IPS), mj heh ophisar jong ka jylla Meghalaya bad Assam ki bahaiing hasem jong ki pulit ophisar kiba la pyndep ia ka training nalor kiwei kiwei.
Na ki 70 ngut ki pulit officers kiba la pyndep ia ka training ki kynthup ia 62 ngut na Assam bad 8 ngut na Mizoram, ha kaba ki don 50 ngut ki shynrang bad 20 ngut ki kynthei.
Haba kren ha kane ka sngi, u Myntri Rangbah ka jylla Assam, u Himanta Biswa Sarma, u la ai ka jingiaroh kaba khraw ia ki bor ka NEPA kiba na ka por sha ka por ki la lah ban ai ia ki jinghikai kiba kongsan na bynta ki heh pulit ophisar na kylleng ki jylla ka ri India.
Haba kren ban ai mynsiem ia ki pulit ophisar, kiba la pyndep ia ka training, u la ong ba kum ki heh pulit kiban sa shimti noh ia la ka kamram ha ki jylla bapher bapher ba kin sa ioh batkam, ki dei ban pyndonkam hok ia ki lad jinghikai ba ki la ioh kum ki pulit ophisar, ban kitkhlieh ia la ka kamram na bynta ban peit ia ka shongsuk shongshngain, ban ioh ruh ia kata ka jingshaniah na u paidbah haba ki pyndep ia la ki kamram.
