Nongpoh, Jymmang 5: Ka long shisha ka jingsarong kaba khraw ia ka skul St. Paul’s Higher Secondary School, Nongpoh, ha kaba kum kawei ka skul kaba paw ha ka jylla ka la lah ban sei biang sa ia kawei ka samla kaba la ioh rung ha ka thup jong ka kyrdan kaba ar, ha ka Result HSSLC examination (Arts Stram) ba la pynbna mynta ka sngi da ka Meghalaya Board of School Education (MBOSE).

Kane ka samla ba la wan nam ia ka skul St. Pauls’ Higher Secondary School Nongpoh ka dei ka samla Nelly Mary Khymdeit, kaba dei ka khun jong ka Kong Sabina Khymdeit bad u Bah (L) Dominic Ral Dkhar na ka Shnong Saiden.

Halor ka jingioh kane ka samla ia kane ka kyrdan ba ar ha ka top-10 jong ka HSSLC examination 2025, ka la ioh ban khur haduh 451 marks ha kaba ka la ioh khur ia ka letter Marks ha ka sobjek English, Khasi, Sociology, Education, Home Science bad ha ka sobjek Political Science.

Kum ka jingleh kmen halor kane ka jingjop ba la wan rah da ka samla Nelly Mary Khymdeit, ka skul St. Paul’s Higher Secondary School, Nongpoh mynta ka sngi ha ka jingialam ka Headmistress ka Sr. Anjelina Ch Marak lem bad ki nonghikai, ki la leh burom ia ka, ha ka phyllaw jong ka skul bad la ai burom ruh da ka jaiñ bad syntiew kum ka jingburom halor kane ka jingjop ba ka la wan rah nam ia ka skul.

Ka Headmistress, ka Sr. Anjelina Ch Marak, haba kren ha kane ka sngi  ka la ai khublei kyrpang ia ka samla Nelly Mary Khymdeit kaba la wan rah ia ka nam bad ka burom ia ka skul, da kaba ka la ioh rung syndon ha ka kyrdan ba ar, ha ka thup Top-10 Merit list ha kane ka result jong ka HSSLC examination 2025 ba la pynbna da ka MBOSE.

Ka samla Nelly Mary Khymdeit ruh haba kren ha kane ka sngi ka la pynpaw ia ka mynsiem jong kaj jingkmen ba ka la ioh pdiang ia kata ka kyrdan kaba ar ha kane ka HSSLC bad kine baroh ki dei ki jingialam bas tad u Blei bad ryngkat ka jingkyrshan na ing na sem bad na ki nonghikai.

Ka la kren ruh ban poi shaduh kane ka thong, kam dei kano kano kaba eh, hynrei ka dei tang ka jingtrei shitom bad ka jingminot kaba u Blei u plie lad plie lynti ban poi sha kane ka kyrdan.

Kawei na ka thong kaba ka angnud, hadien ba la ioh ha kane ka kyrdan, ka pynpaw ba ka angnud ban long Professor hadien ba ka la pyndep sha ki kyrdan kiba shaneng. Ka khubor kaba ka kwah ban ai sha kiwei ki samla ruh ka dei ban long kita ki samla kiba trei shitom, kiba minit bad kina kohnguh khnang ba ngin poi sha kata ka thong jong ka jngjop ha ki jingpule bad ha ka jingim jong ka jingiaid lynti ha kane ka pyrthei.