Tura, Jymmang 01: Kum kawei na ka kynhun Seng bhalang na West Garo Hills, ka A-chik Youth Welfare Organization (AYWO) ka la mih shakhmat ban ujor syndon sha u myntri ba dei peit ia ka tnad sor (Urban Affairs Minister) lyngba ka ophis u Deputy Commissioner ka West Garo Hills ban dawa jur na ka bynta ban phah tohkit bniah halor ka jingkynnoh ba ka don ka jingbym iaid beit iaid ryntih ia ka jingpyntrei ne shna ia kawei ka projek ba la tip kum ka ‘Beautification and Construction of Cenotaph’ ha Tura Babupara.
Kane ka dei ka projek ba la wan rah da ka sorkar jylla lyngba ka tnad ki kam pynroi sor ba la pynmang pisa haduh T. 2 klur tam, kaba dei ruh ka projek ban pynitynnad ne pynbha ia ka Cenotaph, kaba dei kawei na ka jingtei ban pynsah nam ia ki riewshlur ka Ri-lum Garo kiba la len lade ia la ka jingim ban leit sha ka ri Europe na ka bynta ban kyrshan ia ka sorkar British bad ia ki shipai ha ka thma bah kaba ar. Man la u snem ha kane ka jaka ki ju kynmaw burom man la ka16 tarik u Jyllliew ban ai burom ne kynmaw burom ia kine ki riewkhraw bad ki riewshlur na Ri-Lum Garo.
Katkum ka shithi ba la ujor sha u Myntri ka tnad ki kam pynroi sor bad ba la phah ruh lyngba u Deputy Commissioner ka West Garo Hills, kane ka seng ka la kynnoh ba kam sngew iahap satia halor ka rukom pynlait ia ka ‘Tender’ ban shna ne tei pynsahnah ia ka Cenotaph ha Tura Babupara.
Kane ka seng ka la pynpaw ruh ha katei ka shithi ba katkum ka Tender Notice ka dei Dated 01/10/2024 bad ka por ba la buh ban thep ia ki kot ki sla ka dei haduh ka 18/10/2024, hynrei la lap pat ba ia ka Earnest Money Deposit (EMD) da uwei u Contractor u Dhurup Prasad u la wan thep haduh ka 14 tarik u Naiwieng 2024, kaba dei hadien shi bnai ei ei.
Kane ka seng ka la pynpaw ruh ba ka don ia ki sakhi satar halor kane ka jingthep tender kaba ym shym la leh satia katkum ka rukom ba dei ban leh bad ka don ka jingbym khuid satia ha ka rukom thep ia ka tender ha kaba la suba ba kane ka rukom pynlait tender kam da long kaba khuid satia.
Halor kane ka jingbym hun ia ka rukom pynlait ne pdiang ia ka tender ban tei ia katei ka projek pynsah nam ha Tura, kane ka seng ha katei ka shithi ba la phah sha u Myntri ka tnad pynroi sor, ka la dawa mardor ban pynlong da ka jingtohkit kaba bniah, ban pynsangeh shuwa ia kane ka tender, ban pynshitom ia kiba don kti bad ruh ban leh da ka lynti kaba khuid ka ban nym pynduh jingshaniah ia ki paidbah.
