Nongpoh, Jymmang 5: Halor ka jingshah thang ka skul Umsning Town Durbar Secondary School ha ki runar kaba la jia ha ka 4 tarik u Jymmang 2025 ha ka por 11 baje mynmiet, ki bor pyniaid skul lyngba ka Managing Committee mynta ka sngi ki la leit syndon ba ujor da ka ejehar ha Umsning Police Outpost ban pynlong ia ka jingtohkit na ka bynta ban kem ia ki runar kiba don kti ha kane ka kam beain.
Haba kren sha ki lad pathai khubor u Chairman ka Managing Committee bad uba dei ruh u rangbah shnong ka Shnong Umsning Proper-A, u Bah Angelstar Khonghat, u la ong ba kane ka jingshim kabu ki runar ban thang wat ia ka skul, ka la pynlong ia ki bor pyniaid skul ban ujor noh da ka ejehar, namar kane ka buh jingma ia kane ka skul ba kum kine ki jingjia ki la jia ha ki snem ba leit noh.
U la iathuh ruh ha kane ka jingjia, ba ki runar ki la wan ban thang dusmon ia katei ka skul la lah ban pynlip noh ia ka ding, kaba dei da ka jinglap kloi ki nongshong shnong kiba la pyntip sha ki bor nongialam shnong ba la lah ban pynlip ia katei ka ding, kaba la sdang ban klang ha kawei ka kamra Klas.
U la ong ruh mynta ki bor pyniaid skul ki la hap ban ai shuti shwa shi sngi ia ki khynnah, na ka bynta ban maramot bad pynbha ia katei ka kamra Klas ba la wan thang dusmon da ki runar.
Ha kawei ka bynta kumba la dep ban ujor da ka ejehar, ki bor pyniaid skul ki kyrpad ruh ia ki bor pulit ba kin pynlong ia ka jingtohkit kaba bniah halor kane ka jingjia, khnang ban ioh kem ia ki runar kiba don kti ha kum kine ki kam pyntriem kiba ktah ia ki khynnah skul bad ia ka imlang sahlang.
