Nongpoh, Jymmang 09: Ka Balang Presbyterian Wahsynon, lyngba u Pastor ha ryngkat ki Tymmen basan, ki rangbah Balang lem bad ki paid riewngeit ka Balang, ki la sngewnguh eh ia u Bah Sosthenes Sohtun, MLA bad uba dei ruh u MDC ka Jirang, kata ka dei hadien, ba u MLA u la leit ban ai sngewbha da ki tin sopiing ba remdor, na bynta ban tap ia ka Iingmane ba dang shna thymmai jong ka Balang Presbyterian Wahsynon.
Katei ka jingpynpaw ia ka jingsngewnuh jong ka Balang Presbyterian Wahsynon, ka dei hadien ba mynta ka sngi, u MLA Jirang u la leit ban ai sngewbha da ki tin ba remdor na bynta ban tap ia ka Iingmane ba heh bad kaba dang shna thymmai, nalorkata ka dei ruh ka snem ba ka Balang kan rakhe ia ka jingdap ba 50 snem, kata naduh ba la seng ia ka ha u snem 1975.
Haba kren sha ki lad pathaikhubor, u Pastor F. Syngkli ha ryngkat ki Tymmen Basan bad ki Rangbah Balang, ki la pynpaw ba ki sngewkmen eh, ba u Bah Sosthenes Sohtun, u la ai sngewbha da ki tin ba remdor ha ka ban tap ia katei ka Iingmane, ba ka Balang Presbyterian Wahsynon, ka dang shna thymmai mynta.
Shuh shuh, u la ong ruh ba kumba ka long mynta, ba ka Balang ka dang don ha ka jingpynkhreh ia ka jingrakhe halor ka jingdap kaba 50 snem, kumta watla ka Iingmane ka dang don hapdeng ka jingshna thymmai, hynrei ngi khot bad wer ia ki para riewngeit jong ka Balang Presbyterian ba ki wan ban iashimbynta ha katei ka jingrakhe dap 50 snem ka Balang.
Lah ruh ban kdew hangne, ba ka Balang Presbyterian Wahsynon, ka la dei kawei na ki Balang kaba la rim ha ka thain Ri Bhoi Sepngi bad ka dei ruh ka Balang kaba don hapoh ka KJP Synod Sepngi.
