Shillong, Jymmang 22: Naduh ki nonghikai, ki nongtrei bad ki samla pule ka skulbah NEHU mynta ka sngi, ki la bteng ia ka jingdawa kaba jur ba dei ban weng noh mardor ia u Vice Chancellor, u Prof. P.S Shukla, kaba dei hadien ba ki 2 ngut ki Nongmihkhmat na ka Ministry of Education ki la wan poi mynta ka sngi ha katei ka skulbah ban pynlong ia ka jingialang na ka bynta ban ia kren ne ia thir ban iaid beit iaid ryntih katei ka skulbah.
U Additional Secretary ka Department of Higher Education, u Sunil Kumar Baranwal bad u Director, u Subrat Kumar Pradhan, kiba wan mihkhmat na ka Ministry ka tnad Education ka sorkar pdeng, ki la kyntait ban kren ne pynshai sha ki lad pathai khubor, kiba la pynshang ban pan jingshai halor katei ka rai jong ka jingiakynduh lang ba la shim bynta naduh ki Nonghikai, ki Nongtrei ha katei ka skulbah bad kynthup ki samla pule.
U Kumar Baranwal u la shuh iathuh ba katei ka jingiakynduh lang ka long kaba biang, ha shuwa ba un mih noh na katei ka skulbah.
“Ngi la ia kynduh lang bad baroh ki nongtrei katei ka skulbah bad kynthup naduh ki Deans bad ki Head ka Department. Ka long ka jingiakynduh kaba iaid beit iaid ryntih bad ki la rai ban dang trei kham bha ha katei ka skulbah” ong u Additional Secretary na ka Ministry of Education u Sunil Kumar Baranwal.
Haba kren ruh sha ki lad pathai khubor, naduh u president ka North Eastern Hill University Teachers’ Association (NEHUTA), u Prof Lakhon Kma bad u Vice President ka NEHUSU, u Samla Ricky Deiburom Rabon, ki la ong ba kane ka jingiakynduh ia kane ka kynhun ba wan na ka Ministry of Education ka sorkar kmie ka long kaba sei soh, hynrei kawei na ka mat ba ki la buh ha khmat ba kin nym pdiang shuh ban wan phai biang u Vice Chancellor u Prof. P.S Shukla bad ki la dawa mardor ban weng noh ia u kum u Vice Chancellor ka skulbah NEHU.
Shuh shuh, kitei ki nongialam ka NEHUSU bad ruh na NEHUTA, ki la kren shai ruh ba ki kloi ba ia kren ne ia pynbeit na ka bynta ban pyniaid beit iaid ryntih ia katei ka skulbah kaba la mih ka huri hura la bun bnai mynta, hynrei kawei ka rai kaba ki la shim ka long ba da lei lei kim nym lah shuh ban pdiang ba u Vice Chancellor u Prof. Shukla un wan phai biang kum u Vice Chancellor.
