Nongpoh, Lber 21: Ki nongialam ka HNYF naduh ka sengkmie bad na Ri Bhoi District ha ryngkat kiba haïing hasem mynta ka janmiet ki la leit ban pdiang burom ia u Bah Tarson Lymba, ha District Jain Mawsyntai ha Ri Bhoi, kaba dei hadien ba u la lait na ka jingshah set along ha District Jail Mawsyntai na ka jingshah kem bad shah set halor ka jingkynnoh don kti bad ka seng HNLC.
U Bah Tarson Lymba u dei u u nongialam ka HNYF ba bat ia ka kyrdan Disciplinary Secretary ka seng kmie bad ruh u President ka HNYF Southern Riwar Circle bad u la long ruh u dkhot ba shirhem ka seng HNYF bad u nongialam ba la rim tam ka seng kumba la pynpaw da ki nongialam.
Haba pynpaw shaphang ka jingshah kem, u Bah Tarson Lymba kum u nongialam ka seng HNYF, u la shah kem ha ki pulit ka jylla ha ka 10 tarik u Lber 2024, halor ka jingkynnoh ba u don kti bad ka kynhun HNLC. Ha ka 14 tarik u Nailar 2024 da ka jingiasaid u nongsait aiñ u la ioh jamin noh bad dei ha katei hi ka sngi ba ki Pulit ki la kem biang ia u ban dang pynlong ia ka jingtohkit. Dei hadien shisnem tam ba u la shah set along da ka jingiasaid u nongiasait ain mynta ka sngi u la ioh janmin bad la pynlait noh ia u na ka jingshah set along ban leit phai noh sha la ïing la sem.
Na ka liang ki nongialam ka HNYF mynta ka sngi ryngkat kiba haïing hasem ki la pdiang burom ia u Bah Tarson Lymba, hadien ba la pynlait na katei ka jingshah set along ha District Jail Mawsyntai ha Ri Bhoi District.
Na ka liang u Bah Hesting Lyngdoh, President ka HNYF Northern Region ha Ri Bhoi, u la pynpaw ia ka mynsiem jong ka jingkmen bad ai khublei kyrpang ruh ia ka ïingkashari, kaba la ailad ban pynlait noh ia une u dkhot ka seng, kaba dei hadien ka jingiasait da u nongiasait aiñ ka seng. Ha kajuh ka por ruh u ai khublei ia u nongiasait aiñ ka seng ba dei lyngba ka jingtrei shitom jong u, ba la lah ban ioh jamin bad la lah ruh ban pynlait noh ia une u dkhot na ka jingshah set along.
Shuh shuh, ha kane ka sngi, u Bah Bah Tarson Lymba, u la ainguh ia u Blei halor ka jingdon ryngkat jong ha kane ka jingiakynduh jingeh ha ka jingim, kaba u la shah set along kum u nongialam seng bad ha kawei ka bynta ruh u la pynpaw ba um shym la duh mynsiem bad ka la long pynban ka jingioh mynsiem ban dang shakri ia ka seng bad na ka bynta ka jaid bynriew.
Ha kawei ka bynta, u la ai khublei ruh ia ka ïingkashari kaba la ai jamin ia u bad ba mynta ka sngi u la lait noh na ka jingshah set along, kaba dei halor ka jingbishar bahok bad kum u nongialam u la pynpaw ba u dang iai bteng ban shakri na ka bynta ban iada ia ka ri bad ka jaid bynriew.
