Shillong, Ïaïong 28: Ka Federation of Khasi Jaiñtia and Garo People (FKJGP) Central Body, ka dap da ka jing sngewkhia kaba khraw bad ka pynrem jur halor ka jingkem ïa u Samla Sandy Sohtun, President North Eastern Hills University Students Union (NEHUSU). Kum ka seng kala sakhi ïa ki kynrum kynram kaba la mih ha ka skulbah NEHU hadien ba ka kynhun jong ki samla pule jong ka skulbah NEHU hapoh ka jingïalam jong u Samla Sandy Sohtun ban sei madan ïaki kam bamsap bad ki jingbym ïaid beit ïaid ryntih haduh ba la poi u pud ba ki samla pule jong ka Skulbah NEHU kin pynlong ïaka jingshah thngan kaba khlem buhpor ban dawa ban wengkam mardor ïa u Vice Chancellor. Ka jingshim sting jong ka sorkar jylla ban tuklar ïa katei ka kam haduh mynta mynne ka dang pyndkhoh ïa kiba bun ki rukom treikam ha ka skulbah NEHU.
Ka FKJGP ka sngew ba ka jingshah pharep jong u samla Sandy Sohtun, President North Eastern Hills University Students Union (NEHUSU) lyngba jong uwei u Nonghikai jong katei ka skulbah ka lah ban don kaei re kaei kaba sha lyndet ban set da u kak na ka shyntur jong ki samla pule ban dawa ïala ka jong ka hok ban saiñdur ruh na ka bynta ka jingïaid shaphrang jong katei ka skulbah. Ka jingrung jubor jong ki bor pulit hapoh ka campus jong ka skulbah NEHU ha ka jaka ba kan long ka jing shngaiñ kan long pynban kum ka jingpyntieng pynsmiej ïa ki samla pule jong katei ka skulbah. Ka sorkar ka dei ban shimkhia mardor ïa katei ka kam ba teh lakam bad ban thung da ka kynhun tohkit ka bym noh shiliang khmat khnang ba ki jingshisha kin paw pyrthei.
Kum ka seng na ka por sha ka por kala ju ioh ïa shibun ki jingujor halor ka jingshah niewbeiñ bad shah leh shiliang khmat ym tang ïa ki samla pule hynrei wat ïa ki nongtrei ha katei ka skulbah kiba la wan jia ha ki dur bula ki bapher bapher lyngba ka jingngeit niam bapher bapher bad kumta ter ter, kumta na ka liang jong ka FKJGP ka maham jur ïa ki bor kiba nabar ba kim dei satia ban pyrshang ban ïalam bakla bad ban balia siangsdieh da kaba pyrshang ban tap eitmiaw ïa ki kam ba uta u Vice Chancellor u la leh ban pynjah burom ïa ka NEHU ha kaba ki samla pule bad wat ki nongtrei kiba don don ka ka Skulbah NEHU kim mon shuh ïa u ban dang long kum uta u khliehduh ban pynïaid ïa kiei kiei baroh.
Kyntang ïawai, ka FKJGP ka kren da kaba shai ba kan sa tih tyllong ïa kiei kiei baroh bad kan ym shong kli kti satia halor ki jinglong jingman jong ka skulbah NEHU bad kum ka seng kan ym ailad ba ki samla trai ri kin shu kylla long ki langkñia tang na ka bynta ka jingmyntoi jong ki briew kiba nabar kiba don bynta ha ka saiñpyrthei jong ka ri India ba ïar. Kane ka long katkum ka kyrwoh na u Bah Kitboklang Nongphlang, Vice President ka FKJGP-Central Body.
