Shillong, Lber 21: Ka long shisha ka jingkmen kaba khraw bad kaban ai mynsiem ia ki samla pule ka jylla Meghalaya kata hadien ba ka sorkar jylla ka la pynbna ia ka jingpynlait ia ka Scholarship ha ka wat kaba khatduh kaba la kot kumba 85.0779 klur tyngka.
Ia kane ka khubor kaba sngewtynnad, la pynbna da u Myntri Rangbah ka jylla Meghalaya u Conrad K Sangma, da kaba ai khublei kyrpang ruh ia ka Sorkar pdeng kaba la pynlait ia ka scholarship lyngba ka ‘Umbrella Scheme for Post Matric Scholarship’ na bynta ki samla pule Scheduled Tribe 2023-2024.
Katkum ka jingmang ia kane ka Scholarship la pyntip ba la don kumba 76,755 ngut kiba la thep kyrteng ban ioh ia kane ka scholarship, ha kaba la pynlait ia ka pisa ha ka wat kaba nyngkong kaba la kot kumba 42.32 klur tyngka kaba la pynlait ha ka 24 Jylliew 2024 bad la siew sha ki 17, 364 ngut ki samla pule.
Ha ka wat kaba ar pat la pynlait ia ka pisa kaba la kot 66.67 klur tyngka bad la siew sha ki 32,064 ngut ki samla pule ha ka 20 Naiwieng 2024, bad ha ka wat kaba lai bad kaba khatduh la pynlait pisa kumba 85.0779 klur tyngka bad la siew sha ki 27,327 ngut ki samla pule ha ka 21 tarik Lber 2024 bad ka pisa kan sa rung sha ki account jong ki samla ba la applai hadien shisngi ne arsngi.
U Myntri Rangbah ka jylla u Conrad K Sangma, u la pynpaw ia ka jingkmen ban ioh ban pynlait lut ia ka pisa na bynta ka Scholarship jong ki samla pule, da kaba bynrap ba ka sorkar jylla ka don ia ka thong ban pynbiang bad ban pynstet ia ka jingsam ia ka scholarship man u snem kum ka jingkyrshan ia ki samla pule kiba stad.
