Nongpoh, Nohprah 17: Na ki saw ngut kiba la khlad hashen ha ka jingjia kylla ka trok kit dieng ha surok khlaw ha Mynnar Jirang, la pynshisha ba lai na kitei ki dei na ka shnong Iewsohksang, katba uwei pat u dei na ka shnong Center Village Jirang.
Kiba la khlad hashen noh ha katei ka jingjia ba kylla katei ka trok kit dieng, ki dei kiba la tip kum u Edward Nongkhlaw, Teilor Nongphlang bad u Francis Warjri, na ka shnong Iewsohksang, katba uba na ka shnong Jirang Center Village, u dei uba la tip kum u Bankerlang Khyllait bad uba la lait im na katei ka jingjia kylla kali, u dei uba la tip u Benedic Syiem bad uba dang don mynta hapdeng ka jingshah sumar ha Nongbah Shillong.
Katei ka trok kit dieng kaba la kylla hynnin ka janmiet, ka la kylla ha ka riat kaba jylliew kumba 200 meter eiei bad kata ka dei ha ka por ba ka dang wanphai na ka jaka khlaw ba ka wan kit dieng, na bynta ban pynpoi sha ki jaka ot-dieng.
Ia ka met jong kitei ki rangbah kiba la khlad noh na katei ka jingjia, la pynkit noh sha Nongpoh Civil Hospita, na ka bynta ban pyndep ia ki jingdonkam baroh bad mynta ka sngi, kiba haiing ki la wan ban shimti noh ia kitei ki metiap.
Halor katei ka jingjia ba sngewsih, ia kaba la mad da kitei ki longiing na shnong Iewsohksang bad Jirang Center Village, u Bah Sosthenes Sohtun, MLA Jirang, u la leit ban kynduh ia kiba haiing jong kiba la khlad bad nalorkata, u la pynkren ruh sha ki bor ba halor, na ka bynta ban pyndep kloi ia ki jingdonkam baroh bad ruh ban pyllait na kaba leh ia ka Post Mortem, khnang ba kitei ki metiap kin poi noh sha ki iing ki sem bad ban pyndep ia ka lehniam leh rukom kaba khatduh.
