Nongpoh, Iaiong 14: Ka long shisha ka jingmyntoi kaba khraw ia kiba bun ki khynnah sha ki shnong nongkyndong ba hap hapoh ka Raid Thaiang ha Ri Bhoi District, ha kaba ha ka 12 tarik u Iaiong 2025 la lah ban plie paidbah ia kawei ka skul ba la ai kyrteng Ramakrishna Mission School ba la pyniaid lang da ka Ramakirshna Mission, Sohra bad kaba dei kum kawei ruh ka shnat treikam ban kyntiew ia ka jingnang jingstad ki khynnah sha ki shnong nongkyndong.
Ia kane ka skul la wan ban plie da u Myntri sorkar ka Meghalaya u Bah A.L Hek ba dei peit ia ka tnat Animal Husbandry and Veterinary, ha ryngkat ka jingdon lang u Swami Anuragananda, Secretary ka RKM, Sohra, u Dr. Evarist Myrsing, State BJP Secretary bad uba dei kum School’s Patron katei ka skul, u Paiem Nikhos Syiem, Syiem ka Raid Thaiang, u Bah Tolbin Umbah, Rangbah Shnong Mawtari Thaiang lem bad kiwei kiwei ki riew rangbah bad ki paidbah nongshong shnong katei ka thaiñ.
Haba kren ha kane ka sngi kum u kongsan, u Bah A.L Hek u la pynpaw ka jingsngewkmen ba la lah ban plie paidbah ia kane ka Ramakrishna School ha ka Shnong Mawtari Thaiang bad u ai khublei kyrpang ruh ia u Dr. Evarist Myrsing ba dei lyngba ka jingshim khia jong u, la lah ban wan rah ia kane ka skul bad ka dei ruh ryngkat ka jingiatrei lang naduh u Syiem Raid, ki shnong bad ki paidbah.
U la ong ruh ka jingwan kane ka skul Ramakrishna Mission kan long shisha ka jingkyrkhu ia ki samla bad ki khynnah katei ka thain, namar kane ka skul ka dei kaba phai khmat kyrpang ym tang ban kyntiew ia ka pule ka puthi, hynrei kiwei kiwei ki kam pynroi ha kaba bun ki skul kiba pyniaid da ka Ramakrishna Mission ka la pynmih ia bun ki riew khraw kiba la synniang pat na ka bynta ka bha ka miat jong ka imlang ka sahlang ha ka jylla bad ka ri hi baroh kawei.
U la ong ruh ba ki paidbah ki dei ban kmen ba ka jingdon kane ka skul kam dei na ka bynta kito kiba wan na shabar ka dong bad ka thain, hynrei ka phai khmat kyrpang ia ki khynnah na katei ka thain bad lada don kata ka jingiatrei lang kan long shisha kajingkyrkhu na ka bynta ka lawei ba phyrnai ki khynnah ba kane ka skul ka long kum ka shlem ban ai jingnang jingstad ia ki khynnah.
Shuh shuh, u la khot la wer ban don ka jingiatrei lang ha kaba dang pynbha bad pynjanai ia kane ka skul bad kyrmen skhem ba ha ki snem bad ki por ban sa wan kane ka skul kan long kawei na ka skul kaba paw na katei ka thain ha kaba kyntiew ia ka jingnang jingstad ki khun samla ka dong bad ka thain.
Na ka liang u Dr. Evaris Myrsing kum u Patron katei ka skul, u la ai khublei ia ka Ramakrishna Mission bad ruh ia u Bah A.L Hek uba dei u myntri sorkar, namar dei lyngba ka jingiatrei lang la lah ban wan rah ia kane ka skul sha katei ka thain ka ban long shisha ka jingkyrkhu ia ki paidbah ha baroh ki liang.
Kiwei kiwei kiba la ai jingkren ki kynthup ia u Syiem Raid Thaiang, u Paiem Nikhos Syiem, u Swami Anuragananda, Secretary ka RKM, Sohra lem bad kiwei, ha kaba ki la pynpaw ia kajuh ka jingkmen ban mih kane ka skul ba la pyniaid da ka Ramakrishna Mission bad ki kyrmen skhem ba kane ka skul kan ai shisha ka jingkyrkhu ia ki khynnah na ka bynta ka jingnang jingstad kiba long katkum ka juk stad ba mynta.
