Nongpoh, Nohprah 20: Ka Hynniewtrep Achik National Movement (HANM), Western Ri Bhoi ha ka 19 tarik u Nohprah ka la hiar sha ka shnong Nongrim Jirang ban leh ia ki kam isynei na ka bynta ki longïing baduk shwa ban rakhe ia ka Crhistmas bad snem thymmai, ha kaba ha kane ka sngi ka la ai sngewbha da ki jaiñ syaid sha ki 28 tylli ki longïing ba hap hapoh katei ka shnong.
Haba sam ia kitei ki jaiñ syaid la don ryngkat u President ka HANM Western Ri Bhoi u Bah Sumarlang Lyngdoh, u Rangbah Shnong ka Nongrim Jirang u Bah Kle Rani, u President ka HANM Jirang Unit u Bah Wanbok Syngkli lem bad kiwei ki nongialam bad ha ryngkat ka jingdon lang kitei ki longïing baduk kiba la pdiang sngewbha ia ki jaiñ syaid ba la synñiang sngewbha da ka seng HANM Western Ri Bhoi.
U Bah Sumarlang Lyngdoh kum u President ka HANM Western, ha kane ka sngi u la pynpaw ia ka mynsiem jong ka jingkmen ban ai sngewbha da ki jaiñ syaid sha ki longïing baduk jong kane ka shnong bad kane ka long shi bynta ka jingangnud ka seng ban ia don bynta lang bad ki longïing baduk shwa ban rakhe ne lehkmen ia ka Christmas bad snem thymmai.
Haba kren ha kane ka sngi, u Bah Sumalang Lyngdoh kum u nongialam u la pynpaw iaka mynsiem jong ka jingkmen ba ka seng ka la ioh ban sam ia kitei ki jaiñ syaid sha kitei ki longïing baduk bad kane ka dei tang ka jingai sngewbha Christmas bad snem thymmai, ba ka seng ka la pyrshang ha la ka jingkotbor ba ka kwah ban pyrkhat lem tang ia kot ki longïing kiba donkam shisha ia ka jingiarap
Ha kajuh ka por u la ai khublei Christmas bad snem thymmai sha kitei ki longïing,ï ba kin dang ioh pdiang ia kiba bun ki jingkyrkhu ha ka ïing kasem jongki bad khamtam ba kin dang ioh ia ka met kaba koit ba khiah lyngba ka jingkyrkhu jong u Blei Nongbuh Nongthaw.
