Nongpoh, Ïaiong 03: Ki nongialam na ki 3 tylli ki shnong ba hap ha Umsiang hapoh ka Raid Maiong mynta ka sngi ki la ther kylla pynban sha ka seng Confederation of Ri Bhoi People (CoRP), kaba dei halor ka jingkynnoh die jaka ka shnong bad ka Raid sha ka MIDC da kaba ai NOC sop sop khlem ka jingtip ki paidbah bad ki la pynshai ruh ba katei ka jingkynnoh ka dei kaba khlem don nongrim satia.
Ki 3 tylli ki shnong kiba la kyntait halor ka jingkynnoh ka CoRP ki kynthup ia ka shnong Shnong Umsiang Mawpdeng, Umsiang Maiong bad ka Shnoing Umsiang Kraikejam ba hap ha ka Raid Maiong.
Kumba la kren sha ki lad pathai khubor, u Rangbah shnong ka Shnong Umsiang Mawpdeng, u Bah Pynshngain Shylla, u la ther tyngeh ia ka seng CoRP kumba la kynnoh da u Working President u Bah Pateng Myrsing ba ki Shnong bad ka Raid ki la ai NOC sop sop sha ka MIDC kaba thied ia kata ka jaka kaba don 300 akar, ha ka jinglut kaba T. 100 klur bad kane ka jingkynnoh ka dei shisha kaba khlem don nongrim bad khlem da wad ia ka jingshisha.
U la pynshai paidbah ruh haduh mynta kam don satia kata ka jingthied jaka ka MIDC ha Umsiang kumba la kynnoh da ka seng CoRP bad ioh ka lah ban dei sha kiwei ki raid ne ki shnong ba kum ka ki shnong ha Umsiang kim lah ban bah khlieh bad ban shu kynnoh pat ia ka shnong Umsiang khlem da wad ia ka jingshisha ka long kaba ym lah ban pdiang da lei lei, ong u Bah Shylla.
U la ong ruh lada don kano kano ka kam ki paidbah ha katei ka thain Umsiang kim ju leh sop sop ia ka kano kano kam bad ki pyntip sha ki paidbah bad kane pat ka jingkynnoh katei ka seng ka ktah ia ka burom jong ka shnong, ha kaba lada don kino kino ki kynhun seng kynthup ia ka seng CoRP haba don kaei ei kaba long pyrshah kim dei ban shu thad paidbah bad ki dei ban da kylli ne wad bniah shuwa khnang ba kum kine ki jingkynnoh kan nym ktah ia kitei ki paidbah katei ka thain, u la ong.
Shuh shuh, kaba kham sngewkhia ka long ba u shim ha ka kyrteng ki paidbah ba ki shah pynbiej ha ki nongialam da kaba khein poh ba ki dei kiba dang sahdien, hynrei kum ka jingpyntip ha Umsiang ki la mih ki Doctor, ki Nurse, ki ophisar bad kiwei kiwei kiba la don la ka jong ka jingpule bad ban shu khein poh khlem da tip ia ka jingshisha ka long kaba bakla bad kaba ym lah ban pdiang, u la bynrap shuh shuh.
