Nongpoh, Ïaïong 02: Ban pynsngewthuh paidbah halor ka jingdonkam ban pynneh pynsah ia ki tyllong um, ki khlaw ki btap bad ka mei mariang, ka tnad treikam jong ka Soil and Water Conservation, Nongpoh Division, ka la pynlong ia ka prokram kaba kyrpang ha ka shnong Umtung ha kaba la pynkut noh ia ka Watershed Yatra Outreach Campaign ka jingiaid lynti kaba lai taiew ban sam jingtip sha u paidbah kaba hap hapoh ka Pradhan Mantri Krishi Sinchayee Yojana, Watershed Development Components (WEC-PMKSY-II).
Ka tnad Soil and Water Conservation ka la sdang ia ka Watershed Yatra Outreach Campaign ha ka 19 tarik Lber 2025 ha nongbah Shillong da kaba iaid kylleng ki Shnong da ka kali kaba la shna kyrpang ban sam jingtip sha ki paidbah halor ka thong jong ka sorkar ban pynneh pynsah ia ki tyllong Um, ki khlaw ki btap bad ka mei mariang.
Ha kane ka sngi, ba la pynkut noh ia ka Watershed Yatra ha Umtung, la wan ban shimbynta da u Myntri ka tnad Soil and Water Conservation u Marcuise N Marak kum u kongsan, ha ka jingiadonlang ruh u Bah Raja Brahma, ADC ka Ri Bhoi District u ba bat ruh kum u project director ka tnad DRDA, u Dr. R Talang, BDO ka Bhoirymbong C&RD Block, nalor ki heh ophisar ka tnad Soil and Water Conservation, ki nongialam shnong bad khynnah skul.
Haba kren kum u kongsan, u Marcuise N Marak, u la pynpaw ia ka jingkmen ban ia donlang ha kane ka sngi, ban pynkut noh ia ka Watershed Yatra kaba dei ka jingiaid lynti jong ka tnad ban pynsngewthuh paidbah halor ka thong jong ka sorkar ban ri sumar ia ki tyllong um, ki khlaw ki btap bad ka mei mariang na bynta ka jingshngain jong ka lawei kaban sa wan.
U la ong ruh, ba ha kane ka jingiaid lynti jong ka Yatra, la lah ban sam ia ki jingtip ba kongsan ha kaba ia dei bad ka thong katkum ka Pradhan Mantri Krishi Sinchayee Yojana, ha kaba la kyrmen ruh ba lyngba kane ka Yatra ki paidbah kin sngewthuh ban shim ia ka jingkitkhlieh ban iada ia ki tyllong um bad ban pynneh ia ka jingjyrngam jong ka mariang.
U la khot la wer ruh, ia ki paidbah nongshong shnong jong ka jylla ba kin mih shakhmat ban long kum kita ki nongiada (warrior) ia ka mei mariang bad ki jingdon jingem jong ka khnang ba ka pateng kan shongshngain bad ban ioh ia ka jingmyntoi.
Na liang ka tnad Soil and Water Conservation, ka la plie paidbah ruh ia ki jaka pynlang um ha ki khlaw ki btap lyngba ka PMKSY, Watershed Development Component (WDC) 2.0 ha ka shnong Umket.
