Nongpoh, Ïaiong 03: Da ka jingbuddien ka KSU Umsning Circle ia kawei ka Sumo ba la suba ka kit ia ki Khar Bangladesh, kki 11 ngut ki suba Khar Bangladesh ki la shah bat noh ha ka seng KSU Umning Circle hadien ba ki la poi ha Umsning katba ki dang thmu ban kiew sha Nongbah Shillong.
Ha ka jingialam u samla Jester Nongbet, Assistant Organizing Secretary ka KSU North Khasi Hills District, bad ryngkat ka jingdon lang ki dkhot ka Umsning Circle, ki la bat ia kawei ka Sumo kaba don ia u Number ML 04 B 7082 ha ka 2 tarik Ïaiong ha ka por 2 baje nohphai sngi bad na katei ka Sumo ki la ioh ban bat ruh ia ki 11 ngut ki suba Khar Bangladesh ha kaba hadien ba la ioh bat ki la leit ban aiti sha ki Pulit ka Umsning Police Outpost ha Ri Bhoi ba kin leh pat ia kaba donkam katkum ki kyndon ka ain.
Hadien ba la ioh bat ia kitei ki suba Khar Bangladesh, ka seng KSU ka la maham tyngeh ïa ki briew kiba donkti ban pynrung tuh ïa ki khar Bangladesh sha kane ka jylla bad ka ri India bad ki la pynpaw ruh ba ka jylla Meghalaya kam dei satia kata ka jaka theh niut ban wan rah ia ki Khar Bangladesh. Ha kajuh ka por ki la kyrpad ruh ia ki bor pulit ba kin leh katkum ki kyndon ka ain bad ban phah leit pynphai biang ia kitei ki suba Khar Bangladesh sha ka ri jongki ha Bangladesh.
Kitei ki suba Khar Bangladesh ba la ioh bat da ka KSU ki kynthup ia ka Sajauddin Sheik (26), Ka Panna kamal Husein (37), Ka Rabia Begum (27), Ka Kakoli sherda (36) snem, ka Erina din Mullah (30), Ka Shobha Islam (28), ka Unjilla Sardar (27), Ka Poppi Mullah (25), Ka Sonia Sheik (21) lem bad arngut ki khynnah kiba hapoh 15 snem ka ryta.
