Nongpoh, Iaiong 01: Ka All Meghalaya Karbi Association (AMKA) mynta ka sngi ka la sdang ban rakhe ia ka jubili ksihar ka jingiaid lynti kaba 50 snem naduh ba la sui la shor ia kane ka seng, kaba dei ka seng kaba peit kyrpang ia ki jaid bynriew Karbi ha Meghalaya.
Kane ka jingrakhe ia ka jubili ksiar ka la sdang mynta ka sngi, ha kaba la wan ban kyntiew ia ka lama jong ka jubili ksiar da u MLA ka Nongpoh u Bah Mayral Born Syiem kum u kongsan bad yn wan ban pynhiar lama ha ka 3 tarik u Iaiong 2025 da u Myntri rangbah ka jylla, u Conrad K. Sangma ha kaba ia kane ka jingrakhe la pynlong ha Purduwa Kharpati, Ri Bhoi District.
Ha kane ka sngi sdang jong ka jingrakhe ia kane ka jubili ksiar ka AMKA la don ryngkat ruh naduh u president ka AMKA u Bah Robert Jone Ronghang, u Secretary u Bah Bistocan Timung, u Adviser u Bah H.S Engleng, kiwei kiwei ki riew rangbah na ka jaid bynriew Karbi ryngkat ki longkpa, ki longkmie bad ki khun samla kiba la pynphuh pynphieng ia kane ka sngi sdang jong ka jingrakhe ia ka jubili ksiar.
Ha kane ka sngi, nalor ki kyntien kyntu kynpam bad ki kyntien ai mynsiem ia ka AMKA da ki riew rangbah bad u kongsan, la pynphuh pynphieng ruh ruh da ki jingshad, ki jingrwai tyrnai ki khun samla na ka jaid bynriew Karbi.
Haba kren ha kane ka sngi kum u kongsan, u Bah Mayral Born Syiem u la pynpaw ia ka mynsiem jong ka jingsngewsarong ia ki nongialam ka AMKA kiba naduh ba la seng ia ka bad haduh kane ka kynti, ba dei lyngba ka jinglen lade jongki, la ioh ba rakhe ia kane ka jubili ksiar, ka jingiaid lynti kaba 50 tylli ki snem naduh ba la seng ha u snem 1975.
U la ong ruh ka AMKA kum ka kynhun seng ka la shakri ym tang ia ka bha ka miat ki paid Karbi, hynrei ki la shakri bad ia snoh kti lang ruh ban kyntiew ia ka bha ka miat hapoh ka District bad ka jylla hi baroh kawei.
Kum u nongmihkhmat u la kular ruh ban ia don bynta bad ka AMKA ha ki kam shakri na ka ka bynta ki paidbah bad ruh ki paid Karbi bad kum u nongmihkhmat u angnud ban don ka jingiatrei lang na ka bynta ban kyntiew ha baroh ki bynta jong ka long briew man briew kaba ngi donkam ban pynneh ia ka shongsuk shongsain ban kiew ka dong bad ka thain.
