Khanapara, Risaw 29: Kum shi bynta ban ia snoh kti lang ha ka ri bad ka pyrthei hi baroh kawei, ka IA Ayurvedic Medical College ka skulbah University of Science and Technology Meghalaya (USTM) mynta ka sngi la rakhe ia ka 9th National Ayurveda Day, kaba dei ruh ka lyngkhuh sngi kha u Sri Sri Lord Dhanwantari.
Ha kane ka jingrakhe ia ka National Ayuveda Day la shim bynta da u Chancellor ka USTM u M. Hogue, u Vice Chancellor u Prof GD Sharma, u Principal ka IAMC Dr. R K Sharma, u Principal PA Sangma International Medical College u Prof Dr BK Das, Advisor USTM u Dr RK Sharma, bad u Dr. Dhanehwar Kalita, u Principal barim ka Government Ayurvedic College Guwahati kum u nongai jingkren.
Ia kane ka jingrakhe la sdang ruh da ka Ayurveda Walkathon Rally ba la pynlong ha phyllaw ka USTM ba la shim bynta da ki samla pule, ki nongtrei ba ki la rah da ki lama bad ki banner, halor ka phang, “Ayurveda Innovation for Global Health”. La pyni paidbah ruh ia ka AYUR AHARA MELA (Traditional Food Recipe Fest) ba la shim bynta da ki samla pule ban pynkhreh ia kitei ki jingbam ba la pyni paidbah ha ki dukan bapher bapher.
Ia ka jingrakhe la pynlong ha NKC Auditorium kaba la sdang da ka jingthang sharak da ki kongsan bad la shim bynta u Dr. R K Sharma, Principal IAMC uba la ai ia ka jingkren pdaing bad u u Prof. G D Sharma, Vice Chancellor, USTM uba la ai jingkren halor ka Ayurveda.
U Dr. Dhanehwar Kalita, Principal barim ka Government Ayurvedic College Guwahati u la ai jingkren kyrpang shaphang kita ki dawai ne ki jingsumar kiba dei shaphang ka Ayurveda. U la ai ruh ka jingbatai shaphang ka jingsdang ka rukom sumar Ayurveda kaba la kyntiew ia ka koit ka khiah ki briew bad ia ka jingiaid lynti ba la ithuh paidbah ha ka pyrthei hi baroh kawei shaphang kata ka jingsumar Ayurveda.
