Shillong, K’lyngkot 06: Hadien ka jingiap 2 ngut ki briew ha kawei ka par dewiong beaiñ haka shnong Thangsko ha East Jaintia Hills District bala kynnoh ruh ba dei naka jingbthei u bom dynamite, ka Meghalaya Human Rights Commission (MHRC) kala pan ïaka kaiphod ba pura jong katei ka jingjia ba dei ban phah hapoh shibnai.

Haka kyrwoh bala phah da u L Ch Marak Secretary ka MHRC mynta ka sngi ba ar u la ong ba ka MHRC kala shim khia bha ha kaba ïadei bad ka jingïap ba sngewsih jong ki 2 ngut ki briew ha ka shnong Thangsko ha East Jaiñtia Hills district, hadien ba la kynnoh ba ka la don ka jingbthei bom ha ka par dewiong.

Ka Commission ka la ai ruh da ka jingthoh sha u Chief Secretary ka jylla Meghalaya, ban pynlong ïa ka jingtohkit bad ban aiti ïa ka kaiphod tohkit kaba bñiah sha ka Commission hapoh shibnai.

Lah ruh ban kdew hange ba haduh mynta la pynthikna ba uwei u briew bala tip kyrteng kum u Ashok Tamang u la khlad ha kane ka jingjia haka 1 tarik Kylla Lyngkot hadien u la don hapdeng ka jingshah sumar ha Shillong Civil Hospital katba uwei pat ym pat lah ban ithuh.