La iaid shait shait ka jingpynrung klas ia ki samla pule
Nongpoh, Jymmang 07: Sa khyndiat Taiew ba yn plie paidbah noh ia ka Model Degree College kaba don ha shnong Patharkhmah, mynta ka sngi u Bah Sosthenes Sohtun, MLA Jirang, ha ryngkat ka jingdon ki heh ophisar sorkar na ka tnat PWD, PHE, MeECL bad u BDO ka Jirang, ki la leit ban jurip ia katei ka College, na bynta ban tip ia ki jingduna hapoh katei ka College, kata shwa ban plie noh ia ka ia kane ka College.
Ha ka jingialang kaba la long mynta ka sngi hapdeng u MLA, ki ophisar sorkar, Principal bad ki nongialam shnong, ki la iakren halor shibun ki kam ba dei ban pyndep, kata shwa ba yn plie noh ia katei ka College, khnang ba kan long kaba ïaid beit ïaid ryntih, khlem da shah pynthut ia ki samla kiba leit pule hapoh katei ka College.
Hadien ba la kut ka jingialang bad ki ophisar, u Bah Sosthenes Sohtun, haba kren sha ki lad pathaikhubor, u ong ba ka jingkhot jong u ia ki ophisar sorkar ban iakren halor katei ka College, ka long ban pynthikna ba baroh ki jingdonkam hapoh katei ka College ki dei ban long kiba bit ba biang kata shwa ban plie noh ia ka.
Kumba ka long mynta, ka jingpynrung kyrteng na bynta ki samla kiba kwah ban leit pule ha Patharkhmah Model Degree College, ka la ïaid shait shait, ha kaba ka jingpule ne sdang shong Klas jong ki samla kiba pule hapoh katei ka College, kan sa sdang noh ha kane ka Academic Session ha ki Bnai ban wan bad kata hadien ba la dep ban plie paidbah noh ia ka.
Na ki ophisar sorkar, kiba la don bynta ha katei ka jingialang bad u MLA, ki kynthup ia u Bah Jeff Lyndem, EE PWD Nongpoh, Bah L. Majaw, Patharkhmah Sub-division, P. Hajong, BDO Jirang Block, ka Kong A. Mawa, Principal ka Patharkhmah Model Degree College, ki nongialam shnong lem bad shibun ki riew rangbah jong katei ka thain.
