Shillong, Jymmang 07: Kum ka jingiaid bteng ia ka Polisi treikam ka sorkar jylla kaba kham phai khmat ban ai ka jingkyrshan na ka bynta ban pynbit pynbiang ia ki jaka ai jingsumar sha ki paidbah bad ruh ban kyrshan ia ki jaka ai jingsumar (Non-Profit Hospital), u Myntri Rangbah ka Jylla, u Conrad K. Sangma mynta ka sngi u la aiti ia ka song pisa kaba T. 1 klur sha ka Nazareth Hospital Shillong.
Haba kren ha ka jingialang mmynta ka sngi ha Nazareth Hospital Shillong, u Myntri Rangbah ka Jylla, u Conrad K. Sangma, u la ong ba ka sorkar jylla ka dang bteng ban pyndep ia ka thong ba ka la buh bad kum ka sorkar jylla ka kham phai khmat ban pynbit pynbiang ha ka liang ka koit ka khiah. U la ong ruh ka sorkar Meghalaya ka dei ka sorkar kaba kham mang bun ka pisa na ka bynta ki jingdonkam ha ka tnad ka koit ka khiah, haba ia nujor ba kiwei kiwei ki jingmang tyngka ki jylla ha ka ri bad ka thong hi ka long ban pynjanai shuh shuh ia ki jingdonkam na ka bynta ka koit ka khiah ki paidbah ha ka jylla.
“Ka thong ba ka sorkar ka long ban kyrshan thikna na ka bynta ka jingbit jingbiang ha ka liang ka jingai jingsumar ia ki paidbah bad ruh ban ai ka jingsumar ha kata ka dor kaba ki longïing baduk kin kot bor ba kum ka sorkar ka don kata ka jingiatrei ne kyrshan lang ia ki Hospital bapher bapher hapoh ka jylla” bad bynrap ruh ba ka sorkar ka don ia ka thong ba ki jaka ai jingsumar kin ia ryngkat dor bad kiwei ki jaka ai jingsumar ha ka ri (Meghalaya Health Advancement Policy), u la bynrap.
Da kaba ai nam ai burom ruh ia kito kiba ai ka jingshakri ha ka tnad ka koit ka khiah la ka long ha ki jaka ai jingsumar shimet ne ha ki jaka ai jingsumar ka sorkar, u Conrad K. Sangma u la buh ka jingkyrpad ba kin dang iai bteng ban ai ka jingshakri da ka mynsiem jong ka jingnsgewrit, ka jingiaishah bad ka jinglen lade khnang ba ngin dang lah shuh shuh ban pynjanai ia ki rukom ai jingsumar ba paka sha ki paidbah.
Ha kane ka sngi, ka Administrator ka Nazareth Hospital, Shillong, ka Sr Noreen, ka la ai khublei kyrpang ia ka sorkar jylla bad kumjuh ruh ia u Myntri rangbah ka jylla u Conrad K. Sangma, kiba la don ka jingiohi jngai ban kyrshan ia ki jingdonkam jong kane ka jaka ai jingsumar paidbah bad lyngba kane ka jingiarap ka sorkar kane ka jaka ai jingsumar kan pyntreikam thikna na ka bynta ban pynim ia bun ki mynsiem kiba kordor kiba don ha ka jingpang jingshitom bad ruh ban thied ia kita ki tiar ki tar kiba lah ban ai jingiarap kyrkieh ha ka pang ka shitom, na ka bynta ki jingsumar ba paka ia ki Longkmie bad ruh kin pyndonkam ia ka pisa na ka bynta ka College of Nursing ban pdiang kumba 100 ngut kiba wan pule man la u snem.
