Vatican, Jymmang 09: U Cardinal Robert Francis Provost ha ka Conclave 2025 ne ka lympungbah ban jied thymmai ia u Pope, u la shah jied kum u Pope ba thymmai ban mih bujli ha ka jaka u Pope Francis, uba la bam kwai ha dwar u Blei.
U Cardinal Robert Francis Prevost, u la don 69 snem ka rta bad u dei u Pope uba 267 ban mih bujli ha ka jaka u Petrus bakhuid bad un sa shimti kum u nongialam ba hakhlieh duh ka Balang Katholik ha St. Peter, Rome bad yn sa tip paidbah kum u Pope Leo XIV.
U Cardinal Robert Francis Provost u dei ruh u Cardinal ba nyngkong eh ban shah jied kum u Pope na America ha kaba bun ia ka jingim jong u, u la pynlut por ban long kum u nongsharai ha ka Balang ha Peru.
La kha ia u Cardinal Robert Francis Provost ha u snem 1955 bad u ju long ruh u khynnah ba pynlut por ha ki kam shakri duwan bad la pynkyntang Lyngdoh ia u ha u snem 1982.
Ki kyntien kiba la pynlung mynsiem bha ia ki paid riewngeit ka Balang Katholik ha shi satlak ka pythei, ka dei ka kyntien kaba u la khlei na la ka shyntur, “ Ka jingsuk ia phi baroh” hadien ba u la shah jied kum u Pope ba thymmai, kaba dei hadien ba la pynbna ia u kum u Pope ba thymmai bad u khliehduh jong ka Balang Katholik ha shi tyllup ka pyrthei.
