Nongpoh, K’lyngkot 10: Na ka daw ka jingbym hun kiba haing ha sem hadien ba la lap ia ka dien mong haka met ba la khlad noh jong uwei u samla hadien ba la wan rah sha la ïing na ka jingsumar ha Supercare Hospital Shillong, kiba haing hasem ki la ujor noh da ka ejehar ha Mawlai Police Station ban dawa tohkit halor ka jingkhlad noh uwei u samla na ka Shnong Khulia ha Ri Bhoi District ba la kynnoh ba u la mynsaw jur na ka jingkyllon ha NEHU, Shillong bad ba la rah ia u ban shah sumar sha Supercare Hospital Shillong.

Kane ka jingjia ka la jia ha ka janmiet jong ka 6 tarik u Kyllalyngkot 2026, ha kaba la pyntip sha kiba haïing ba uwei u samla ba trei ha NEHU u la mysaw jur na ka jingkynnoh ba u la shu kyllon hi ha madan  bad ruh la rah ia u sha Supercare Hospital Shillong ban ioh ia ka jingsumar, hynrei une u samla u la khlad noh ha ka 8 tarik u Kyllalyngkot 2026 kaba la buh ia kiba haïing hasem hapdeng ka umdum hadien ba la lap ia ki dien mong bad ki jingjngem snam haka met jong u.

Une u samla uba la khlad na katei ka jingmynsaw ba la kynnoh ba u shu kyllon ha madan ha NEHU Shillong, u dei uba la tip kyrteng kum u Bipul Inghi na ka Shnong Khulia ha Ri Bhoi District.

Kumba la iathuh da kiba haïing la ong ba kim don kano kano ka jingsuba sniew hadien ba la rah ia u sha Supercare Hospital Shillong ban ioh ia ka jingsumar ba la pynrung syndon ia u sha ICU hadien ba la pyntip da kitei ki briew kiba la iarap rah ia u sha katei ka jaka ai jingsumar, hynrei dei hadien ka 8 tarik u Kyllalyngkot ba u la khlad noh na kane ka pyrthei bad ba la wan rah noh ia sha la ïing ba ha ka por ba pynsum la lap pynban ia ki dien mong bad ki jingmynsaw ha ka met ha kaba ki la suba sniew ba ym dei ba u la khlad na katei ka jingkyllon bad la suba ba lah ban don kaei kaei ei ei sha lyndet ba ki ba haïing hasem ki la ujor noh da ka ejehar ha Mawlai Police Station.

Haba ia kren sha ki lad pathai khubor mynta ka sngi ha Nongpoh, uwei na u kñi ka kur Inghi u Bah Tisha Inghi bad u Rangbah Shnong u Bah Komin Ingtih, ki la ong ba ha ka jingshisha kim don kano kano ka jingsuba sniew halor ka jingkhlad utei u samla ha kaba ki la ngeit ba ka lah ban dei na katei ka jingkyllon ha madan, hynrei dei hadien ba la wan rah ia ka met sha la ïing la lap pynban ia ki dienmong bad ki jingjngem snam ha ka met kaba la pynlong ia ki ba ki hap ban ujor noh da ka ejerhar sha ki Pulit ka Mawlai Police Station.

Ki la ong ruh ruh kumba ki la lap ia kitei ki dien mong bad ki jingjngem snam ka met na ka met utei u samla ka la pynlyngngoh ia ki  bad kim don hi ruh kano kano ka jingsuba sniew iano iano, hynrei ban tip ia ka jingshisha ki hap ban ujor da ka ejehar sha ki Pulit bad ia ka met la rah noh sha Civil Hospital Nongpoh ba la pyndep ia ka post-mortem mynta ka sngi ha kaba ka jingkwah ka ïing ka sem ka long ban tip ia ka jingshisha la u la khlad na kaba u kyllon ne ioh don kano kano ka jingjia ba sha lyndet halor ka jingkhlad noh une u samla.

Shuh shuh, ki la ong ruh ia ka mynta kim don kano kano ka jingsubar sniew bad ki dang beit ia ka kaiphod jong ka post-mortem bad lada don ei ei sha lyndet ki pulit hi kin leh ia kaba donkam kaktum ki kyndon ain na ka bynta ban pynioh ia ka hok jong une u samla uba la khlad noh.