Nongpoh, Lber 20: Ka Hynniewtrep Youth Council (HYC), Raid Thadrang Circle kala la pynpaw ia ka jingsngewkhia jur halor ka jingpyntrei torti ia ka surok kaba la shna lyngba ka skhim Pradhan Mantri Gram Sadak Yojana (PGMSY) kaba pyniasoh na Nongthymmai Kyrdem sha Khyndewso ha ka jingjrong kaba 10 kilometer.
Ki nongialam jong ka seng kiba la leit ban jurip mynta ka sngi hapoh ka jingialam u samla Pyndap Masharing ba la synran lang ruh dau samla Shemphang Masharing, General Secretary ka HYC Ri Bhoi District, haba kren sha ki lad pathai khubor, ki la iathuh ba ha kane ka jingjurip, la lap ba ka jingpyntrei ia kane ka surok ka long kaba torti shaba palat ha kaba ka rukom ban siang rong ka long kaba stang bad long kumba siang carpet bad lah ban khlong da ki kti.
Kitei ki nongialam ki la pynpaw ruh baki ba bun na ki bynta jong kane ka surok ki long kiba at ba them bad ki don ki bynta ba wat tang hadien shi taiew ka jingpyndep ban siang rong, ka surok kala sdang ban pei thliew bad julor noh, watlada na ka liang u kontraktor u la pyrshang ban maramot biang.
Halor kane ka bynta, ka seng ka dawa mardor ba u kontraktor ba pyntrei ia kane ka kam, udei ban pynbha biang ia kane ka surok bad dawa ruh ba ki bor ba dei khmih ka tnad PWD ki dei ban shimkhia ban hukum ia utei u kontratktor ba udei ban trei bha ia ka surok katkum ki kyndon ba la buh, khnang ba kan long ka jingmyntoi ia ki paidbah.
Shuh shuh, kitei ki nongialam ka seng ki la maham ruh ba lada u kontraktor um leh eiei halor kane ka bynta bad ruh na ka liang ka tnad PWD ka sngap mynthi, na ka liang ka jongki, kum ka seng kim banse ban shim pat da ki sienjam kiba tyngeh nangne shakhmat ban leh ia kaba donkam na ka bynta ka hok bad jingmyntoi ki paidbah.
