Nongpoh, Nohprah 28: Mynta ka sngi ka la don ka jingialang jong ka Party Congress ha Iing Dorbar Sajer Nongpoh bad kata ka long ba bynta ban pynbna paidbah noh ia u Kyrtong Congress bad u ban sa aireng ha kane ka Ilekshon MDC ne ban jied ia ki Nongmihkhmat sha KHADC.
Lyngba jong katei ka jingialang, la pynskhem ia u Bah Lawrence Nongrum, u samla Rangbah na ka shnong Umdap ba un long kum u kyrtong MDC na ka Party Congress ha kane ka Ilekshon MDC, ka ban sa long ha u snem ban wan.
Ha katei ka jingialang, ki nongai jingkren na ki nongialam ka Congress, ki la pynpaw ba ki paidbah ka Nongpoh Constituency, ki dang don ia ka jingshaniah kaba pura ia ka Party bad halor kata, la sakhi lyngba ka jingkyrshan ki paidbah ia ka Party Congress ha kane ka Ilekshon MP ba dang shu dep, ha kaba ki paidbah ki kyrshan ia ka Party Congress, da kaba tam ia kiwei pat ki Kyrtong, kampher watla u Kyrtong Congress um poi sha ka thong jong ka jingjop.
Namarkata, lyngba ka jingkren na kitei ki heh Congress, ki la kyntu ia ki para nongtrei ka Party Congress, ba kin trei shitom bad ruh ban ai ka kyrshan pura ia u Bah Lawrence Nongrum, khnang ba un poi sha ka thong jong ka jingjop bad ruh ba ka Congress kan ïoh ia u lakam synshar ha District Council.
